Qozog‘istonda harorat global o‘rtachadan ikki baravar tez oshmoqda

Qozog‘istonda so‘nggi 50 yil davomida havo harorati global o‘rtachaga nisbatan qariyb ikki baravar tez oshgan. Bu haqda “Kazgidromet” ma’lumotlariga tayanib, CentralAsia xabar berdi.

1976–2025-yillarda mamlakatda o‘rtacha yillik havo harorati har o‘n yilda 0,4 darajaga oshgan. Dunyo bo‘yicha esa bu ko‘rsatkich 0,18–0,20 darajani tashkil etgan.

Mutaxassislar Qozog‘istonning Yevrosiyo markazida, okeanlardan uzoqda joylashgani haroratning global o‘rtachadan tezroq oshishiga sabab bo‘luvchi omillardan biri ekanini qayd etmoqda. Okeanlar haroratdagi keskin o‘zgarishlarni yumshatadi.

Mamlakat hududlarida ham o‘zgarishlar bir xil emas. Masalan, Qarag‘anda viloyatida o‘rtacha yillik harorat har o‘n yilda 0,29 darajaga, G‘arbiy Qozog‘iston viloyatida esa 0,59 darajaga oshgan.

Eng katta o‘sish bahor faslida kuzatilgan — har o‘n yilda o‘rtacha 0,7 daraja. G‘arbiy va janubiy hududlarda issiq kunlar soni ham ko‘paymoqda.

Kuzatuvlar boshlangan 1941-yildan buyon Qozog‘istonda eng issiq yil 2025-yil bo‘lgan. O‘sha yili o‘rtacha yillik harorat 1961–1990-yillar me’yoridan 2,96 darajaga yuqori qayd etilgan.