Energetika vaziriga parlament soʻrovi yuborildi

Taʼkidlanganidek, soʻnggi yillarda Oʻzbekistonda qayta tiklanuvchi energiya manbalarini va energiya tejovchi texnologiyalarni joriy etish boʻyicha keng koʻlamli islohotlar amalga oshirilib, ekologik barqarorlikni taʼminlash va iqlim oʻzgarishining oldini olish borasida sezilarli yutuqlarga erishildi.

Prezidentning 2023 yil 16 fevraldagi “2023 yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari toʻgʻrisida”gi qarori ijtimoiy va uy-joy kommunal xizmat koʻrsatish sohalari hamda iqtisodiyot tarmoqlarida qayta tiklanuvchi energiya manbalarini keng joriy etishda muhim huquqiy asos boʻlmoqda. 

Mazkur hujjat ijrosi boʻyicha oʻtgan davrda respublikada 133 ming 786 ta obʼektga oʻrnatilgan umumiy quvvati 1 ming 748 MVt quvvatli quyosh panellari toʻgʻrisidagi maʼlumotlar “Yashil energiya” axborot tizimida tasdiqlandi. Ijtimoiy soha va davlat idoralarining 20 ming 416 ta obʼektiga 385 MVt, tadbirkorlik subʼektlarining 30 ming 713 ta obʼektiga 948 MVt, koʻp qavatli 2 ming 155 ta uylarga 27,5 MVt, aholining 80 ming 502 ta xonadonlariga 388 MVt quvvatga ega boʻlgan quyosh panellari oʻrnatildi.

Shu bilan birga, oʻrganishlar ushbu sohada hali oʻz yechimini kutayotgan qator masalalar borligini koʻrsatmoqda. Xususan, 2 ming 139 ta obʼektga 29 MVt quvvatga ega boʻlgan quyosh panellari oʻz muddatida oʻrnatilmagan, 281 ta obʼektga oʻrnatilgan 6,1 MVt quvvatga ega panellar esa ishchi holatda emas.

Bugungi kunda respublikada 7 ta korxonada yillik quvvati 770 MVt hajmga ega boʻlgan quyosh panellari, 5 ta korxona tomonidan esa yillik hajmi 200 mingdan ziyod quyosh suv isitish kollektorlarini ishlab chiqarish yoʻlga qoʻyilgan boʻlsada, shamol generatorlari ishlab chiqarilmayapti.

Shuningdek, respublikada quyosh panellaridan foydalanish hajmi keskin ortib borayotganiga qaramay, hozirga qadar faoliyat muddati tugagan yoki yaroqsiz holga kelgan quyosh panellarini qayta ishlash va utilizatsiya qilish mexanizmi yoʻlga qoʻyilmagan. 

Majlisda shundan kelib chiqib, qayta tiklanuvchi energiya manbalarini keng joriy etish, respublikamizda qayta tiklanuvchi energiya manbalari qurilmalarini ishlab chiqarishni tashkil etish, faoliyat muddati tugagan yoki yaroqsiz holga kelgan quyosh panellarining atrof-muhitga zararining oldini olish boʻyicha amalga oshirilayotgan ishlar yuzasidan asoslantirilgan tushuntirishlar berish haqida energetika vaziriga parlament soʻrovi yuborildi.