Samarqandda yigʻilish davomida 7 kishi qamoqqa olindi

Qayd etilishicha, joriy yil 14 fevral kuni Bosh prokuror oʻrinbosari Sh. Aminov rahbarligida Samarqand viloyatida energetika sohasida sodir etilayotgan korrupsion holatlar hamda tizimni "korrupsiyasiz soha"ga aylantirish boʻyicha tanqidiy yigʻilish oʻtkazilgan.  

Unda "Hududiy elektr tarmoqlari" va "Hududgaztaʼminot" aksiyadorlik jamiyatlari, Samarqand viloyati hamda tumanlar va shaharlar filiallari xodimlari, shuningdek, boshqa masʼullar ishtirok etgan. 

Yigʻilish jarayonida taʼminot korxonalarining korrupsiyaviy jinoyatlarni sodir qilganlikda ayblangan 7 nafar xodimiga nisbatan qamoq ehtiyot chorasi qoʻllanilgan. 

Shuningdek, yigʻilish soʻngida sohadagi korrupsiyaviy holatlarning oldini olish maqsadida taʼminot korxonalari rahbarlariga sohada keskin oʻzgarishlar qilish, ijro va mehnat intizomini qatʼiy taʼminlash, ayniqsa, xodimlar oʻrtasida profilaktika choralarini yanada kuchaytirish boʻyicha topshiriqlar berilgan.