Fargʻonada voyaga yetmagan "haydovchi" YTH qurboni boʻldi

Bayon qilinishicha, 2004 yilda tugʻilgan fuqaro M.Gʻ. amakisi Yo.Gʻ.ga tegishli boʻlgan "BYD Song EV" mashinasini tegishli hujjatlarsiz boshqargan. 

Holat yuzasidan 30 yanvar kuni maʼmuriy bayonnoma rasmiylashtirib, Vazirlar Mahkamasining 149-sonli qarori asosida YPX inspektori R.Q. tomonidan jarima maydonchasiga olib ketilayotganida "Damas" mashinasi bilan toʻqnashib ketgan. 

"Damas" boshqaruvida 2007 yilda tugʻilgan voyaga yetmagan X.N. boʻlib, u ustozi A.S.ga tegishli (ustozi A.S. voyaga yetmagan X.N.ning haydovchilik guvohnomasi yoʻqligini bila turib, avtomobilni unga bergan) avtomobilni haydovchilik guvohnomasiz  boshqargan. 

U "Qapchugʻay" mahallasida ikkinchi darajali yoʻldan asosiy yoʻlga chiqib yuborishi oqibatida, yoʻl-transport hodisasi sodir boʻlgan. "Damas" avtomashina haydovchisi X.N. tan jarohati olib, koʻrsatilgan tibbiy muolajalarga qaramasdan shifoxonada vafot etgan. 

Bosh prokuratura matbuot kotibi Hayot Shamsutdinovning yozishicha, YTH yuzasidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qoʻzgʻatilgan. Hozirda tergov harakatlari olib borilmoqda.