Toshkentda bir kunda uchta YTH yuz berdi

Toshkent shahar YHXB axborot xizmatiga koʻra, kecha soat 23:00 larda Mirobod tumani Shahrisabz koʻchasida jamoat transporti ishtirokida YTH sodir boʻldi. 

Unda M.I. ismli avtobus haydovchisi rul boshqaruvini yoʻqotib qoʻyishi oqibatida mashinani beton toʻsiqqa urib yuboradi. Mazkur "avariya"da hech kim jarohatlanmagan. 

Shuningdek, kecha soat 22:20 larda Chilonzor tumani Bunyodkor shoh koʻchasida 2 ta "Malibu", "Lacetti" hamda "Labo" avtomashinalari ishtirokida toʻqnashuv yuz bergan. 

Ushbu YTH oqibatida Bunyodkor shoh koʻchasi boʻylab  qisqa muddatli tirbandlik yuzaga kelgan va zudlik bilan bartaraf qilingan. Hodisa sabab tan jarohat olganlar yoʻq. 

Bundan tashqari, 28 yanvar kuni 19:00 larda Yakkasaroy tumani Afrosiyob koʻchasida "Epica" rusumli transport vositasida yongʻin kelib chiqqan. 

Yongʻin tuman FVB xodimlari tomonidan bartaraf etilgan. Yongʻin oqibatida tan jarohat olganlar boʻlmagan. 

Yuqorida keltirib oʻtilgan misollar faqatgina rasmiy manba tomonidan izohlangan holatlar edi. Ochigʻini aytganda, poytaxtda bu kabi YTHlarning soni ancha koʻp. Bunday noxushliklarning koʻpib borayotganiga turlicha sabablarni keltirib oʻtish mumkin. 

Jumladan, haydovchilarning tezlik cheklovlariga amal qilmasligi, qizil chiroqda harakatlanish yoki svetoforning taqiqlovchi ishorasiga boʻysunmaslik, transport vositalari orasidagi masofani saqlamaslik, notoʻgʻri quvib oʻtish kabi oʻnlab sabablarni keltirib oʻtish mumkin.