Forish tumanidagi bogʻchalarda 37 nafar bola ovqatdan zaharlandi

Qayd etilishicha, 9 oktabr kuni 9:00 dan 16:00 ga qadar 1,3,5 va 7-sonli maktabgacha taʼlim mufassallarining jami 37 nafar nafar tarbiyalanuvchisi isitma koʻtarilishi, koʻngil aynishi, qorin ogʻrigʻi, ich ketish va holsizlik kabi shikoyatlari bilan tuman tibbiyot birlashmasiga murojaat qilgan. Ular 3 yoshdan 7 yoshgacha boʻlgan.

Jizzax viloyati sanitariya epidemiologik osoyishtalik va jamoat salomatligi boshqarmasining dastlabki xulosasiga koʻra, ushbu bogʻchalarda ommaviy zaharlanish yuzaga kelishida oziq-ovqat mahsulotlarini tashish, saqlash, ishlov berish jarayonlaridagi sanitariya qoida va normalarining buzilishi holatlari mavjudligi sabab boʻlgan. Bu inson organizmida oshqozon ichak hazm qilish tizimining buzilishiga olib kelishi mumkinligi aniqlangan.

Holat yuzasidan Forish tuman prokuraturasi tomonidan Jinoyat kodeksining 205-moddasi 1-qismi (Hokimiyat yoki mansab vakolatini suiisteʼmol qilish) bilan jinoyat ishi qoʻzgʻatilib, surishtiruv ishlari olib borilmoqda, deyiladi xabarda.

Eslatib oʻtamiz, avvalroq Toshkent viloyatining Boʻka, Piskent, Oqqoʻrgʻon va Quyi Chirchiq tumanlarida jami 1922 nafar bola ovqatdan zaharlangani haqida xabar bergan edik. Viloyat hokimi Zoir Mirzayevga koʻra, oʻsha vaqtda bolalarni davolash uchun 5-6 milliard soʻmlik dori-darmonlar shifoxonalarga yetkazib berilgan.