Qamoqdagi hokim millionlanb pul ajratish boʻyicha qaror chiqardi

Joriy yilning 8 iyul kuni Jizzax viloyati Sharof Rashidov tumani hokimi va hokimlik bosh mutaxassisi qoʻlga olindi. Ular tadbirkorga “Tokchilik” Mahalla fuqarolar yigʻinida hududidagi umumiy oʻrta taʼlim maktabi uchun ajratilgan 1,7 gektar yerda 8 ta koʻp qavatli uy qurishga ruxsat olib berish evaziga 30 ming AQSh dollari talab qilgan.

5 iyul kuni bosh mutaxassis 10 ming dollar olib, uni hokimga bergan. 8 iyul kuni esa tadbirkordan qolgan 20 ming dollarni olgan va unga ruxsat hujjatlarini topshirgan. Shu kuni u hokim bilan hokimiyat binosi oldida uchrashgan vaqtda, ikkala mansabdor ham pora olishda gumon qilinib Davlat xavfsizlik xizmati xodimlari tomonidan hibsga olingan.

Voqeadan soʻng tuman hokimi deputatlik daxlsizligidan mahrum etilib, unga Jinoyat kodeksining 210-moddasi yaʼni pora olish, bosh mutaxassisga esa 168-modda firibgarlik va 211-modda pora olishda vositachilik qilish boʻyicha jinoyat ishi ochilgan.

Hibsdagi hokim bir emas 5 qarorga imzo qoʻygan. Qarorlarning barchasi mablagʻ ajratish bilan bogʻliq. Qiziq tomoni bularning deyarli hammasi 9 iyul kuni qabul qilingan.

8 iyul kuni chiqarilgan qarorga koʻra, sobiq hokim nomidan tuman obodonlashtirish boshqarmasiga jami 120 million soʻm ajratilgan.

9 iyul kungi tuman hokimligi texnik bazasini mustahkamlash maqsadida, devonxona mollarini xarid qilish jarayonida vujudga kelgan qarzdorliklarni qoplash, org-texnika vositalarini taʼmirlash hamda xoʻjalik mollari xarid qilish uchun 150 million soʻm tuman hokimligiga mablagʻ tuman hokimligiga ajratilgan.

Shu kunning oʻzida oila va xotin-qizlar boʻlimlari moddiy texnik bazasini mustahkamlash maqsadida yana 100 million soʻm mablagʻ tuman hokimligiga ajratilgan.

Jizzax viloyatidagi Otchopar massivida sunʼiy qoplamali mini futbol maydonini qurish hamda Qulpisar mahalla fuqarolar yigʻinida joylashgan madaniyat boʻlimiga qarashli binoni joriy taʼmirlash kabi ishlar uchun jami jami 600 million soʻm mablagʻni tuman hokimligiga ajratilgan.

Yana moddiy texnik bazasini mustahkamlash, devonxona mollarini xarid qilish jarayonida vujudga kelgan qarzdorliklarni qoplash, org-texnika vositalarini taʼmirlash hamda xoʻjalik mollari xarid qilish uchun 255 million soʻm mablagʻ tuman hokimligiga ajratilishi haqidagi qaror qabul qilingan.

Bu qarorlarning barchasi sobiq hokimning hibsda ekanligi vaqtida qabul qilingan.

Kecha 21- iyul kuni mazkur holatlarga Jizzax viloyati prokuraturasi rasmiy munosabat bildirib chiqdi.

Munosabatga koʻra, ushbu holat yuzasidan Sharof Rashidov tuman prokuraturasi tomonidan tergovga qadar tekshiruv harakatlari olib borilmoqda.

Toʻplangan hujjatlar boʻyicha qonuniy qaror qabul qilinishi viloyat prokuraturasi tomonidan nazoratga olingan.

Xoʻsh sizningcha bu jinoyatga mos javobgarlik boʻladimi? Nega hokim hibsdaligi vaqtida shuncha mablagʻ chiqarish boʻyicha qarorlar qabul qilindi? Oʻz fikrlaringizni izohlarda yozib qoldiring hamda PARADIGMA.UZʼni kuzatishda davom eting.