Fransiya Prezidenti Mirziyoyevni orden bilan taqdirladi

Qayd etilishicha, Mirziyoyevning Fransiyaga tashrifi doirasida Parij shahrida Faxriy legion ordenini topshirish marosimi bo‘lib o‘tgan. Davlat rahbariga mukofotni Fransiya Prezidenti Emmanuel Makron topshirgan.

"O‘zbekiston Prezidenti ikki mamlakat hamkorligini rivojlantirish, xalqlarimiz o‘rtasidagi do‘stlik va o‘zaro anglashuvni mustahkamlashga qo‘shgan ulkan hissasi uchun ushbu ordenga sazovor bo‘ldi", deyiladi xabarda.

Mirziyoyev mukofot uchun Fransiya rahbariga samimiy minnatdorlik bildirib, keyingi yillarda sermahsul hamkorlikda yuksak natijalarga erishilgani, ikki mamlakat munosabatlari strategik sheriklik darajasiga ko‘tarilganini qayd etgan. 

Ma’lumot o‘rnida, Faxriy legion ordeni 1802-yilda ta’sis etilgan. Fransiyada ushbu orden alohida xizmatlarning davlat darajasida e’tirof etilishi va shon-sharafning eng yuqori belgisi hisoblanadi.