Oʻzbekiston va AQSh yetakchilari uchrashdi

Oʻzbekiston Prezident dastlab Oq uyning Faxriy mehmonlar kitobiga qayd yozib qoldirdi.

Soʻng Oval xonada yetakchilar muzokara oʻtkazdilar. Oʻzbekiston bilan AQSh oʻrtasidagi strategik sheriklik munosabatlarini yanada rivojlantirish, siyosiy muloqotni mustahkamlash, savdo-iqtisodiy, investitsiyaviy va madaniy-gumanitar hamkorlikni kengaytirish masalalari koʻrib chiqildi.

Joriy yil sentabr oyida Nyu-York shahrida oliy darajada erishilgan kelishuvlarni amalga oshirishga alohida eʼtibor qaratildi.

Global va mintaqaviy ahamiyatga molik dolzarb masalalar, shu jumladan, «C5+1» formatida Markaziy Osiyo va AQSh oʻrtasidagi hamkorlikni chuqurlashtirish yuzasidan fikr almashildi.

Davlat rahbari Donald Trampni ichki va tashqi siyosatdagi yuksak muvaffaqiyatlari bilan samimiy tabrikladi. Uning oʻtkir xalqaro va mintaqaviy mojarolarni tinch yoʻl bilan hal etish borasida qoʻshyotgan shaxsiy hissasi va say-harakatlari alohida qayd etildi.

Yetakchilar qoʻshma loyihalarni ilgari surishning institutsional mexanizmlarini yaratish va takomillashtirish muhimligini taʼkidladilar.

Uchrashuv yakunida davlat rahbari AQSh yetakchisini oʻzi uchun qulay muddatda Oʻzbekistonga rasmiy tashrif bilan kelishga taklif etdi.