Gʻazoda Isroil hujumlari oqibatida bir sutkada 63 nafar falastinlik halok boʻldi

Isroil sektorni qamal qilishda davom etmoqda va insonparvarlik yordamlarining kirishiga toʻsqinlik qilmoqda. Gʻazo hukumati bu harakatlar ayanchli oqibatlarga olib kelayotganini taʼkidlamoqda.

Xabarlarga koʻra, Isroil harbiy samolyotlari Gʻazodagi Mustafo Hofiz maktabiga zarba bergan. Bu maktabda koʻchirilgan shaxslar yashayotgan edi. Hujum natijasida 12 kishi, jumladan ayollar va bolalar halok boʻldi, oʻnlab kishilar yaralandi. Zarba natijasida binoga katta zarar yetdi va yongʻin kelib chiqdi.

Isroil armiyasi Tuffah tumanida joylashgan Fahd as-Sabah maktabiga ham ikki bor zarba berdi. Bu maktab ham koʻchirilgan shaxslar uchun boshpana sifatida xizmat qilayotgandi. 

Gʻazodagi Nablus chorrahasida insonparvarlik yordamini kutayotgan falastinliklarga qilingan hujum natijasida 24 kishi halok boʻldi.

Sektorning janubiy qismidagi Xon-Yunus tumanida amalga oshirilgan Isroil hujumi natijasida 26 kishi halok boʻldi, ulardan 7 nafari insonparvarlik yordamini kutgan fuqarolar edi. Shuningdek, Isroil aviatsiyasi Xon-Yunusning gʻarbida joylashgan hududdagi koʻchirilgan shaxslar uchun moʻljallangan lagerga zarba berdi. Natijada koʻplab palatkalar toʻliq yonib ketdi.