Germaniyadagi saylovda konservatorlar ustun keldi

Bugun, 24 fevral kuni eʼlon qilingan rasmiy natijalarga koʻra, Fridrix Mers boshchiligidagi konservativ XDI/XSI bloki 28,6 foiz ovoz bilan gʻolib chiqqan. Ikkinchi oʻrinda juda oʻngparast "Germaniya uchun muqobil" partiyasi 20,8 foiz ovoz toʻplagan. 

Uchinchi oʻrinda esa chap markazdagi GSDP — "Germaniya sotsial-demokratik partiyasi" 16,4 foiz bilan yakunlagan. Toʻrtinchi oʻrinda "Yashillar" va "90 Uyushmasi" (11,6 foiz), beshinchi oʻrinda "Chap Partiya" (8,8 foiz) qayd etgan.   

ErDP — "Liberal erkin demokratik partiya" va chap populist SVI — Sara Vagenknext Ittifoqi Bundesdagga oʻtmadi. Birinchisi 4,3 foiz ovoz, ikkinchisi esa 4,972 foiz toʻplagan. Parlamentga oʻtish uchun kamida 5 foiz ovoz yigʻish shart. 

Germaniya federatsiya kansleri Olaf Shols kecha, 23 fevral kuni Fridrix Mers va  XDI/XSI bloki bilan koalitsiya tuzish boʻyicha shaxsiy muzokaralar olib bormasligini va yangi hukumat tarkibiga kirmasligini maʼlum qildi. "Men kanslerlikka nomzod boʻldim", deya jarayonga xulosa bergan u. "Bild" gazetasi uning soʻzlarini isteʼfoga chiqishiga ishora sifatida talqin etmoqda. 

Fridrix Mers esa yangi hukumatni 2025 yil 21 aprel — Pasxa bayramiga qadar tuzishga vaʼda berdi. Kimlar unga kiritilishi haqida gapirishdan bosh tortgan siyosatchi uning partiyasi  GuM bilan birga davlatni boshqarmasligini taʼkidlagan.