"iPhone 17" olib kirmoqchisizmi? Bojxonada yangi qoidalar kuchga kirdi

Maʼlumki, soʻngi vaqtlarda bojxona chegarasi orqali notijorat maqsadida mobil qurilmalarni olib kirish jarayonida toʻlovlar bilan bogʻliq savollar koʻpaymoqda.

Vazirlar Mahkamasining 2025 yil 19 apreldagi 244-son qarori bilan jismoniy shaxslar shaxsiy ehtiyoji uchun olib kiradigan tovarlar uchun bojsiz olib kirish meʼyorlari quyidagicha belgilangan.

Havo transporti orqali — 1000 AQSh dollarigacha, Temir yoʻl va daryo transporti orqali — 500 AQSh dollarigacha, avtomobil yoki piyoda oʻtkazish punktlari orqali — 300 AQSh dollarigacha belgilangan.

Agar mobil qurilmaning qiymati belgilangan normadan oshsa, meʼyordan ortiq qismga nisbatan 30 foiz miqdorida yagona bojxona toʻlovi undiriladi.

Shuningdek, Vazirlar Mahkamasining 2025 yil 31 yanvardagi 55-son qaroriga muvofiq, bojxona organlari tomonidan bojxona kirim orderini toʻldirish va rasmiylashtirish uchun BHMning 25 foizi (103 000 soʻm) miqdorida yigʻim undiriladi.

Mobil qurilmaning bojxona qiymati chek, kvitansiya yoki boshqa tijorat hujjatlarida koʻrsatilgan narxlardan kelib chiqib belgilanadi.

Agar shaxs tovar qiymatini tasdiqlovchi hujjatlarni taqdim etmasa, bojxona organi mustaqil ravishda qiymatni belgilaydi. Bu holda ular qoʻlidagi elektron deklaratsiya bazasi maʼlumotlari yoki muqobil manbalar (ishlab chiqaruvchi kompaniyalar narxlari, rasmiy preys-listlar, byulletenlar va boshqalar)dan foydalanadi.

Masalan, fuqaro tomonidan "iPhone 17" olib kirilganda, agar chegarada chek yoki kvitansiya taqdim etilsa, bojxona qiymati aynan shunday hujjatlardagi summa asosida belgilanadi.

Agar hujjatlar boʻlmasa, narx ishlab chiqaruvchi "Apple" kompaniyasining fuqaro kelgan davlatdagi rasmiy saytidagi maʼlumotlar asosida hisoblanadi.

Shuningdek, qurilmaning bojxona qiymati uni olib kirilayotgan davlatdagi bozor narxlari bilan ham bogʻliq boʻladi.

Bojxona qoʻmitasi maʼlumotlariga koʻra, "iPhone 17" modelini bojxona rasmiylashtirishda qoʻllanilayotgan qiymatlar fuqarolar uni asosan olib kelayotgan davlatlar kesimida aniqlanmoqda.

Yangi maʼlumotlar va davlatlar boʻyicha narxlar yangilanganda qoʻshimcha rasmiy axborot taqdim etiladi.

Fuqarolar uchun mobil qurilmalarni olib kirishdagi bojxona tartiblari aniqlashtirildi. Asosiy tavsiya — chek va tijorat hujjatlarini saqlash hamda bojxonada ularni taqdim etish. Bu orqali ortiqcha toʻlov va noaniqliklarning oldi olinadi.