Davlat byudjetiga 34,2 milliard soʻm zarar yetkazilishining oldi olindi

Bojxona qoʻmitasining Kontrabandaga qarshi kurashish boshqarmasi tomonidan Andijon, Samarqand, Fargʻona viloyati bojxona boshqarmalari va tegishli huquqni muhofaza qiluvchi idoralar bilan hamkorlikda transchegaraviy jinoiy guruhni fosh qilish maqsadida tezkor tadbir oʻtkazildi.

Qirgʻiziston Respublikasi bojxona xizmatidan olingan tezkor maʼlumotga asosan havo yoʻllari orqali “Xitoy-Qirgʻiziston” yoʻnalishida Bishkek shahriga olib kelingan xalqaro kurerlik joʻnatmasida Oʻzbekiston Respublikasi aksiz markalarining 2,5 million dona qalbaki nusxalari borligi aniqlandi.

Maʼlum boʻlishicha, Xitoyda tayyorlangan ushbu soxta markalar dastlab Qirgʻizistonga, soʻngra Oʻzbekistonga olib kirilishi rejalashtirilgan. Oʻtkazilgan tezkor tadbirning dastlabki bosqichida Bishkek shahrida aksiz markalarni Oʻzbekistonga olib ketish maqsadida qabul qilib olgan qoʻshni mamlakat va Oʻzbekiston fuqarolari bojxona xodimlari tomonidan qoʻlga olindi.

Shundan soʻng, tezkor tadbir Oʻzbekiston hududida, yaʼni Andijon viloyatining Boʻston tumanida davom ettirilib, qalbaki aksiz markalarni qabul qilib olayotgan Oʻzbekiston fuqarosi ham qoʻlga olindi. Ushbu fuqaro qalbaki aksiz markalarni Samarqand viloyatida yashovchi fuqaroga yetkazib berishi kerak edi.

Tezkor tadbirning yakuniy bosqichi Samarqand viloyatida oʻtkazilib, nihoyat qalbaki aksiz markalarni qabul qilib oluvchi asosiy shaxs ham qoʻlga olindi. Ushbu fuqaroning yashash xonadoni koʻzdan kechirilganida esa u yerda Oʻzbekiston Respublikasi aksiz markalarining 710 ming dona qalbaki nusxalari borligi aniqlandi.

Oʻtkazilgan tezkor tadbirlar davomida jami 3 million 210 ming dona Oʻzbekistonda alkogol mahsulotlarini qadoqlash uchun foydalaniladigan qalbaki aksiz markalar aylanmasiga chek qoʻyildi.

Buning natijasida esa davlat byudjetiga 34,2 milliard soʻm zarar yetkazilishining oldi olindi. Shu bilan birga, minglab yurtdoshlarimizning salomatligi asrab qolindi.

Hozirda mazkur holat yuzasidan bojxona organlari tomonidan jinoyat ishi qoʻzgʻatildi.