2026 yilda iqtisodiy oʻsish surʼati sekinlashishi kutilmoqda

Bu haqda 18 dekabr kuni boʻlib oʻtgan Senat majlisida bosh vazir oʻrinbosari, iqtisodiyot va moliya vaziri Jamshid Qoʻchqorov maʼlum qildi.

Vazirning taʼkidlashicha, Xalqaro valyuta jamgʻarmasi 2025 yil yakunlariga koʻra Oʻzbekiston iqtisodiyoti 6,2 foizga oʻsishini prognoz qilgan. Biroq iqtisodiy blok kutilmalari mazkur koʻrsatkichdan yuqoriroq shakllangan.

“2026 yilda iqtisodiy oʻsish surʼati 6,6 foiz boʻlishi, yalpi ichki mahsulot hajmi kishi boshiga 4 ming dollardan oshishi kutilmoqda. Iqtisodiy oʻsish kredit portfelining 13 foizga, asosiy kapitalga investitsiyalarning 8,1 foizga, oltinni hisobga olmagan holda eksportning 15,1 foizga oʻsishi hisobiga taʼminlanadi”, — dedi Jamshid Qoʻchqorov.

Shuningdek, prognozlarga koʻra:

• bozor xizmatlari — 14,5 foiz,
• sanoat ishlab chiqarishi — 6,4 foiz,
• qurilish sohasi — 10,2 foiz,
• qishloq xoʻjaligi — 4,2 foiz oʻsishi kutilmoqda.

Bosh vazir oʻrinbosari kelgusi yilda mamlakatda inflyatsiya darajasini 7 foizdan oshirmaslik choralari koʻrilishini ham taʼkidladi. Uning soʻzlariga koʻra, 2027 yil yakuniga kelib inflyatsiya surʼati 5–6 foiz atrofida shakllanishi rejalashtirilgan.