Turkiy davlatlar iqtisodiyoti 673,6 milliard dollarga yetdi

Iqtisodiy islohotlar va kommunikatsiyalarni tahlil qilish markazi Turkiy davlatlar tashkiloti kotibiyati bilan birgalikda joriy yilning birinchi choragi uchun "Turk iqtisodiy sharhi" hisobotini nashr etdi.  Bu haqda UzA xabar berdi.

Hujjatda tashkilotning ishtirokchi mamlakatlari va kuzatuvchilarining iqtisodiy ko‘rsatkichlari tahlili keltirilgan. 

Yalpi ichki mahsulot va aholi soni

Hisobot davrida turkiy davlatlarning umumiy yalpi ichki mahsuloti 673 milliard 557,5 million dollarga yetdi. Bu global iqtisodiyotning 2,34 foizidir. 

Mintaqaning umumiy aholisi esa 178,8 million kishini kishini tashkil etgan. Bu dunyo aholisining 2,8 foiziga teng. 

Savdo aylanmasi 

Birinchi chorakda turkiy davlatlarning umumiy savdo aylanmasi 326 milliard 11,55 million dollarga yetdi, bu jahon savdo aylanmasining taxminan 3,73 foizini tashkil etadi. 

Mamlakatlar bo‘yicha iqtisodiy o‘sish sur’atlari quyidagicha: 

• Qirg‘izistonda 10,1 foiz;
• O‘zbekistonda 8,7 foiz;
• Turkmanistonda 8,5 foiz;
• Shimoliy Kiprda (Shimoliy Kipr Turk Respublikasi) 6,3 foiz;
• Qozog‘istonda 3,0 foiz;
• Turkiyada (tashkilotning eng yirik iqtisodiyoti) 2,5 foiz;
• Vengriyada 1,7 foiz;
• Ozarbayjonda 0,3 foiz.

Savdo aylanmasi bo‘yicha Turkiya 155 milliard 122 million dollar ko‘rsatkich bilan tashkilotning mutlaq yetakchisi bo‘ldi. 

Undan keying o'rinlarda:

• Vengriya 87 milliard 445 million dollar;
• Qozog‘iston 32 milliard 908 million dollar;
• O‘zbekiston 18 milliard 23 million dollar ko‘rsatkich qayd etdi. 

Sanoat sohasi

Sanoat sohasida eng yuqori o‘sish sur’atlari yirik ishlab chiqarish va infratuzilma loyihalari hisobiga Qirg‘izistonda 14 foizni, Shimoliy Kiprda 9,2 foizni, O‘zbekistonda 8 foizni, Turkmanistonda 2,4 foizni va Turkiyada 1,1 foizni tashkil etdi. 

Qishloq xo‘jaligi sohasida esa eng yuqori o‘sish sur’ati Shimoliy Kiprda qayd etilib, 7,9 foizni tashkil qildi. 

O‘zbekistonda qishloq xo‘jaligi o‘sishi 5,1 foiz, Qozog‘istonda 3,4 foiz, Qirg‘izistonda 2,8 foiz va Turkiyada 2,7 foiz bo‘ldi.