«Dom» quruvchi firma 3 oyda qurilishni boshlamasa, yeri olib qoʻyiladi

Koʻp kvartirali turar joylar qurish uchun yer uchastkalarini ijaraga berish boʻyicha auksion gʻolibi tuman (shahar) hokimiyati bilan «Elektron auksionlarni tashkil etish» AJda roʻyxatga olinadigan elektron shartnoma (oferta) tuzadi va belgilangan muddatlarni nazarda tutadi.

Mazkur muddatlar:

koʻp kvartirali turar joylar qurish uchun auksionda sotilgan yer uchastkalari boʻyicha loyihaoldi hujjatlarni tayyorlash uchun 15 kun;

loyiha ishlarini bajarish uchun 2 oy va qurilish ishlarini boshlash uchun 3 oy;

yer uchastkasida qurilishi rejalashtirilgan obʼektni foydalanishga topshirishni oʻz ichiga oladi.

Auksion taklifi talablari bajarilmaganda esa yer uchastkasi belgilangan tartibda qaytarib olinadi va takror savdolarga chiqariladi.

Shuningdek, tadbirkorlik faoliyati va shaharsozlik maqsadlarida elektron onlayn-auksionlarda realizatsiya qilinadigan yer uchastkalarida qurilish ishlari boshlanganidan ularni foydalanishga topshirilguniga qadar barcha jarayon bosqichlarini «Onlayn mahalla» elektron platformasida monitoring qilish tizimi joriy etiladi.