Namanganda tikilgan kiyimlar jahon bozorlarida sotilmoqda

Namangan toʻqimachilik boʻyicha mamlakatimizda yetakchi. Viloyat sanoatining uchdan biri, eksportining yarmi shu sohaga toʻgʻri keladi. Bugungi kunda 2 ming 500 ga yaqin toʻqimachilik korxonalari faoliyat koʻrsatmoqda. Ular 250 ga yaqin brendlar ostida mahsulot tayyorlab, yuz mingdan ortiq insonni yuqori daromad bilan taʼminlayapti.

Sanoat rivojiga qoʻshimcha sharoit yaratish maqsadida “Namangan” erkin iqtisodiy zonasi Toʻraqoʻrgʻon tumaniga kengaytirilgan edi. Yigirmaga yaqin loyiha qatorida bu yerda “Iftixor kiyim sanoat” klasterining yangi korxonasi ham barpo etildi.

13 avgust kuni boʻlib oʻtgan videoselektor yigʻilishida davlatimiz rahbari toʻqimachilik korxonalarining yirik brendlar bilan hamkorligi masalasiga alohida urgʻu bergan edi. “Iftixor kiyim sanoat”da shunday tizim yoʻlga qoʻyilgan. Bu yerda “Bugatti”, “Pierre Cardin”, “Roy Robson”, “Baldessarini”, “Lavard”, “Jake’S”, “Engbers”, “Cinque”, “Walbusch” kabi mashhur brendlar buyurtmalariga koʻra mahsulot tayyorlanmoqda. Namanganda tikilgan kiyimlar Yevropa doʻkonlarida sotilmoqda.

Bundan tashqari, “Mercedes-Benz”, “BMW”, “Rolls-Royce” kabi avtomobillar uchun oʻrindiq matolari ham ishlab chiqarilmoqda. Mazkur yoʻnalishda u mintaqamizda yagona korxona hisoblanadi. Umuman, korxona yigirmaga yaqin xorijiy brendlar bilan hamkorlikda ishlamoqda.

Yangi loyihaning umumiy qiymati 198 million dollar boʻlib, mablagʻlar asosan qurilish ishlari va ilgʻor texnologiyalarni jalb etishga yoʻnaltirildi. Zamonaviy inshootlar barpo etildi, maxsus laboratoriya tashkil qilindi. Germaniya, Italiya, Turkiya va Polsha kabi toʻqimachilikda yetakchi mamlakatlardan keltirilgan energiya tejamkor uskunalar ish unumdorligini oshirdi. Korxonadagi zamonaviy laboratoriya sifat nazoratini taʼminlash va nufuzli brendlar ishonchini qozonishda muhim oʻrin tutmoqda.

Dastlab oddiy tikuvchilik sexi sifatida ish boshlagan “Iftixor kiyim sanoat” bugun paxta yetishtirishdan tortib, tayyor mahsulotni eksportga yoʻnaltirayotgan yirik klasterga aylandi. Sifat boʻyicha qatʼiy talablar uni xalqaro bozorga olib chiqdi.

Prezident korxonadagi ish jarayoni bilan tanishdi, xodimlar bilan suhbatlashdi.

Korxona toʻliq quvvatga chiqqach, yiliga 100 million dollarlik mahsulot ishlab chiqaradi. Bu orqali 2 mingta yangi ish oʻrni yaratiladi, davlat byudjetiga esa yiliga salmoqli soliq tushumlari qoʻshiladi. Xalqaro brendlar bilan hamkorlik mahsulotga kafolatli bozor, katta valyuta tushumlari va yangi ish oʻrinlarini taʼminlaydi.

Bu yerga Namanganda oʻtayotgan “Kambagʻallikdan farovonlik sari” xalqaro forumining xorijiy mehmonlari ham tashrif buyurdi. Milliy hamda xorijiy brendlar uchun tikilgan tayyor kiyimlar, shuningdek, oziq-ovqat, charm, qurilish materiallari, farmatsevtika tarmoqlaridagi mahsulotlar koʻrgazmasi namoyish etildi.

Oʻzbekistonda biznes uchun yaratilgan sharoitlar, milliy mahsulotlarimiz turi va sifati mehmonlarda katta taassurot qoldirdi.

Shu yerda davlatimiz rahbariga Namangan viloyatida xorijiy investitsiyalar ishtirokidagi loyihalar haqida axborot berildi. Xususan, shaharsozlik, toʻqimachilik, qurilish materiallari, elektrotexnika, turizm, qishloq xoʻjaligi va kimyo sanoati kabi yoʻnalishlarda 252 ta yirik loyiha amalga oshirilishi rejalashtirilgan.

Mutasaddilarga investor va tadbirkorlar uchun barcha qulayliklarni yaratib, loyihalarni jadallashtirish, koʻproq ish oʻrinlari yaratib, aholi daromadini oshirish boʻyicha topshiriqlar berildi.

Shu bilan Prezident Shavkat Mirziyoyevning Namangan viloyatiga tashrifi yakunlandi.