Oʻzbekistonda islom moliyasi joriy etilsa, sogʻlom iqtisodiyotga yoʻl ochiladi

Forum ikki kunlik muhokamalari davomida islom moliyasi sohasidagi nufuzli olimlar va mutaxassislarni Toshkentda jamladi. 

Forumning asosiy mavzusi islomiy moliyani rivojlantirish, ilgʻor amaliyotlarni moliya tizimiga joriy etish, olimlar, regulyatorlar, standartlarni belgilovchi tashkilotlar va soha mutaxassislari oʻrtasida hamkorlikni mustahkamlash hamda islomiy huquqqa oid masalalar yuzasidan fikr almashish maydonini yaratishga qaratildi.

Forum doirasida islomiy bank tizimiga oʻtish jarayoni, bank konversiyasida korporativ boshqaruv, moliyaviy mahsulotlar, huquqiy va meʼyoriy qiyinchiliklar, amaliyotdagi muammolar va ularning yechimlari masalalari muhokama qilindi.

Forumning ikkinchi kunida Xalqaro musulmon ulamolari ittifoqi prezidenti Shayx Ali Muhyiddin Qoradogʻiy maʼruza qildi. U islom bankchiligining barqaror moliya va global iqtisodiyotdagi ahamiyati haqida fikr bildirdi.

Shuningdek, maʼruzalarda anʼanaviy mahsulotlarni islomiy alternativi bilan almashtirish jarayonida qonunchilik uygʻunligi va global standartlarga moslashish zarurligi qayd etildi. Maʼruzalardan soʻng yangi shartnomalarga oʻtish, man qilingan elementlarni bartaraf etish va xalqaro tajribalarni integratsiya qilish yoʻllari muhokama etildi.

Zakot, vaqf va sadaqa kabi ijtimoiy vositalarni bank mahsulotlari bilan uygʻunlashtirish orqali moliyaviy inklyuziyani kuchaytirish va jamoatchilikni qoʻllab-quvvatlash imkoniyatlari koʻrsatildi.

– Islom moliyasi aholining turli qatlamlari moliyaviy ehtiyojlarini qondirish va mavjud moliyaviy tizim yukini kamaytirishda muhim ahamiyatga ega, – deydi xalqaro ekspert Madzlan Hussayn. – Islom moliyasi aktivlar va xizmatlarga asoslangan boʻlib, ichki va tashqi bozordagi moliyaviy resurslarni davlat va jamiyat manfaati yoʻlida samarali yoʻnaltirish imkonini beradi. Soʻnggi yillarda islom moliyasiga boʻlgan talab ortmoqda. Shu oʻrinda ayta olaman, Oʻzbekiston islom moliyasini rivojlantirish potensiali yuqori. Oʻtkazilgan tadqiqot natijalariga koʻra, aholining maʼlum qismi anʼanaviy bank xizmatlaridan diniy eʼtiqod nuqtai nazaridan foydalanmaydi. Bu, oʻz navbatida aholi qoʻlidagi boʻsh pul mablagʻlari, jamgʻarmalarining iqtisodiyotda faol harakatsiz, qoʻshilgan qiymat yaratmasdan turganini bildiradi. Islom moliyasi bu mablagʻlarning aktiv harakatini taʼminlash evaziga faol iqtisodiy investitsiyalarning paydo boʻlishiga xizmat qiladi.

Forum yakunida rezolyutsiya eʼlon qilindi. Forum Oʻzbekiston uchun inson kapitalini rivojlantirish, huquqiy asoslarni takomillashtirish va islomiy bankchilikni joriy etishda muhim bosqich boʻldi.