Shohimardonga vertolyot qatnovi yoʻlga qoʻyiladi

Yaqin kunlarda Shohimardonga vertolyot orqali   borish mumkin boʻladi. Bu haqida OʻzA muxbiri Fargʻona viloyati hokimining oʻrinbosari Xurshid Ahmedov bilan suhbatlashdi.

– Maʼlumki, Shohimardonga borish uchun Oʻzbekiston – Qirgʻiziston, soʻngra Qirgʻiziston – Oʻzbekiston chegaralaridan oʻtish lozim. Qaytishda ham huddi shunday. Aytingchi, sayyohlarga bu borada qanday qulayliklar yaratish mumkin?

– Prezidentimiz tashabbusi bilan ikki mamlakat chegaralaridagi oʻtish maskanlari kunu tun, yaʼni 24 soat ishlaydigan boʻldi. Qolaversa, ID kartalarning joriy etilishi va ular Oʻzbekiston – Qirgʻiziston chegaralarida asosiy hujjat sifatida eʼtirof etilishi yana bir katta qulaylik boʻldi. Natijada bir kunda Shohimardon yoʻnalishining oʻzida chegaradan 15 mingga yaqin yoʻlovchi oʻtmoqda. Agar 2024 yilda Shohimardonga jami 500 mingdan ziyod mahalliy va qirgʻiz fuqarolari oʻtgan boʻlsa, 2025 yilning buguniga qadar ular soni sal kam 1 millionni tashkil etmoqda.

Olimlarning, masalan, akademik Akmal Saidovning taʼkidlashicha, Soʻxda bundan 8-10 ming yil avval, yaʼni vodiyda eng dastlabki hayot paydo boʻlgani, odamlar yashagani ilmiy jihatdan isbot qilingan. Buning sabablaridan biri Soʻxning goʻzal tabiati, maʼdanlarga boy daryosi va, albatta, toza havosi bilan bogʻliq, deydilar. Hozir ham shunday. Soʻxga tabiat bilan yuzma-yuz boʻlgani, uning shoshqaloq daryosi suvida pishgan olma-yu guruchlaridan totingani, nafas yoʻllarini davolovchi havosini toʻyib-toʻyib simirgani boradilar.

– Qariyb 2 yildan buyon Soʻxga Fargʻonadan muntazam ravishda samolyot uchib bormoqda. Sayyoh va aholi bunga allaqachon koʻnikkan hamda bu hizmatdan unumli foydalanmoqda. Aytingchi, shunday xizmat Fargʻona va Shohimardon oʻrtasida ham tashkil qilinadimi?

– Bugun yuzlab Amerika va Avstraliyadan kelgan sayyohlarni Soʻxga samolyotda olib bordik. Ularga Soʻx tabiati, uning daryo-yu chashmasi yoqdi. Oldimizga katta niyat qoʻygan edik: Fargʻonadan Shohimardonga ham uchoqlar uchirishni. Bugungi tadbirkorlar kechagi tadbirkor emas. Ularning oʻzlari shunday tashabbus bilan chiqishdi. Fargʻonadan Shohimardonga vertolyot qatnovini yoʻlga qoʻyishmoqchi. Hozir bu haqida hukumat darajasida rozilik ishorasi berildi. Ayni choqda vertolyotni Fargʻonaga olib kelish, Shohimardon va Yordon qishloqlarida vertolyot qoʻnadigan maydonchalar tashkil etish ishlari bilan shugʻullanyapmiz. Tez kunlarda Fargʻonadan Shohimardonga qatnaydigan reyslar amalga oshiriladi. Va u yerdagi dam oluvchilar Shohimardondan Fargʻonaga olib kelinadi.