YaTTlar aylanmasi 1 mlrd soʻmga yetmasa ham QQSga oʻtkazilishi mumkin

Yillik aylanmasi 1 mlrd soʻmga yetmagan ayrim yakka tartibdagi tadbirkorlar (YaTT) QQS toʻlovchisi sifatida avtomatik roʻyxatga olinayotgani yuzasidan kelib tushgan murojaatlarga javoban, Soliq qoʻmitasi bu holatlar Soliq kodeksi talablariga muvofiq amalga oshirilayotganini maʼlum qildi.

Qoʻmita izohiga koʻra, Soliq kodeksining 462-moddasi 8-qismiga asosan, yangi roʻyxatdan oʻtgan yuridik shaxs, YaTT yoki oʻzini oʻzi band qilgan shaxsning tovarlar (xizmatlar) realizatsiyasidan olgan daromadi belgilangan nazorat summasidan oshsa, u roʻyxatdan oʻtilgan yildan keyingi yildan boshlab QQS va foyda soligʻini toʻlashga oʻtadi.

Nazorat summasi qanday hisoblanadi?

Nazorat summasi quyidagi formula asosida aniqlanadi:
1 mlrd soʻm 365 kunga boʻlinib, soliq toʻlovchi roʻyxatdan oʻtgan sanadan yil oxirigacha boʻlgan kunlar soniga koʻpaytiriladi.

Misollar:

• Agar YaTT 2025 yil 1 oktabrda roʻyxatdan oʻtib, yil oxirigacha 300 mln soʻm daromad olgan boʻlsa, bu summa 252,05 mln soʻm nazorat koʻrsatkichidan yuqori hisoblanadi. Shu bois u 2026 yil 1 yanvardan QQS va foyda soligʻini toʻlashga oʻtadi.
• Agar YaTT 2025 yil 1 noyabrda roʻyxatdan oʻtib, yil oxirigacha 150 mln soʻm daromad olgan boʻlsa, bu summa 167,12 mln soʻm nazorat koʻrsatkichidan kam boʻlgani sababli, QQS va foyda soligʻini toʻlash majburiyati yuzaga kelmaydi.

Qoʻmita maʼlum qilishicha, mazkur normalarga asosan 2026 yil 1 yanvardan QQS va foyda soligʻini toʻlashga oʻtkazilgan tadbirkorlik subʼektlarining shaxsiy kabinetlariga tegishli xabarnomalar yuborilgan.