ЯТТлар айланмаси 1 млрд сўмга етмаса ҳам ҚҚСга ўтказилиши мумкин

Йиллик айланмаси 1 млрд сўмга етмаган айрим якка тартибдаги тадбиркорлар (ЯТТ) ҚҚС тўловчиси сифатида автоматик рўйхатга олинаётгани юзасидан келиб тушган мурожаатларга жавобан, Солиқ қўмитаси бу ҳолатлар Солиқ кодекси талабларига мувофиқ амалга оширилаётганини маълум қилди.

Қўмита изоҳига кўра, Солиқ кодексининг 462-моддаси 8-қисмига асосан, янги рўйхатдан ўтган юридик шахс, ЯТТ ёки ўзини ўзи банд қилган шахснинг товарлар (хизматлар) реализациясидан олган даромади белгиланган назорат суммасидан ошса, у рўйхатдан ўтилган йилдан кейинги йилдан бошлаб ҚҚС ва фойда солиғини тўлашга ўтади.

Назорат суммаси қандай ҳисобланади?

Назорат суммаси қуйидаги формула асосида аниқланади:
1 млрд сўм 365 кунга бўлиниб, солиқ тўловчи рўйхатдан ўтган санадан йил охиригача бўлган кунлар сонига кўпайтирилади.

Мисоллар:

• Агар ЯТТ 2025 йил 1 октябрда рўйхатдан ўтиб, йил охиригача 300 млн сўм даромад олган бўлса, бу сумма 252,05 млн сўм назорат кўрсаткичидан юқори ҳисобланади. Шу боис у 2026 йил 1 январдан ҚҚС ва фойда солиғини тўлашга ўтади.
• Агар ЯТТ 2025 йил 1 ноябрда рўйхатдан ўтиб, йил охиригача 150 млн сўм даромад олган бўлса, бу сумма 167,12 млн сўм назорат кўрсаткичидан кам бўлгани сабабли, ҚҚС ва фойда солиғини тўлаш мажбурияти юзага келмайди.

Қўмита маълум қилишича, мазкур нормаларга асосан 2026 йил 1 январдан ҚҚС ва фойда солиғини тўлашга ўтказилган тадбиркорлик субъектларининг шахсий кабинетларига тегишли хабарномалар юборилган.