Ispaniyada bolalar uchun ijtimoiy tarmoqlardan foydalanish cheklanishi mumkin

Ispaniyada voyaga yetmaganlar uchun ijtimoiy tarmoqlardan foydalanishni cheklash rejalashtirilmoqda. Bu haqda mamlakat bosh vaziri Pedro Sanches 3 fevral kuni BAAda boʻlib oʻtgan yetakchilar sammitida maʼlum qildi.

Unga koʻra, 16 yoshgacha boʻlgan bolalar ijtimoiy tarmoqlardan haddan tashqari koʻp foydalanayotgani va platformalar oqimida qolib ketayotgani qayd etildi.

Bosh vazir ushbu chorani bolalarni “raqamli Yovvoyi Gʻarb”dan himoya qilish zarurati bilan izohladi.

Taklif etilayotgan taqiq voyaga yetmaganlarning raqamli himoyasi toʻgʻrisidagi amaldagi qonunga oʻzgartishlar kiritish orqali joriy etiladi. Qonun loyihasining muhokamasi kelgusi haftada boshlanishi kutilmoqda.

Sanches bu tashabbusni qoʻllab-quvvatlashga Yevropaning yana beshta davlati qoʻshilishni rejalashtirayotganini ham maʼlum qildi.