Ilon Mask atrofidagi soʻnggi yangiliklar: katta boylik va jiddiy ayblovlar

Mask boyligi keskin oshdi

Ilon Maskka tegishli SpaceX kompaniyasi sunʼiy intellekt va ijtimoiy tarmoqlar sohasida faoliyat yurituvchi xAI kompaniyasi bilan birlashtirildi. Natijada milliarderning boyligi 84 milliard dollarga oshib, 852 milliard dollarga yetdi.

Tahlillarga koʻra, SpaceX kompaniyasi 1 trillion dollarga, xAI esa 250 milliard dollarga baholanmoqda. Ikki kompaniyaning umumiy qiymatidagi 43 foiz ulush, yaʼni 542 milliard dollar Ilon Maskka tegishli.

Shuningdek, uning asosiy aktivlari quyidagilardan iborat:

• Tesla kompaniyasidagi 12 foiz ulushi — 178 milliard dollar;
• Tesla aksiyalari orqali — 124 milliard dollar.

Fransiyada X kompaniyasi ofisi tintuv qilindi

Shu bilan birga, Fransiyada Ilon Maskka tegishli X (sobiq Twitter) kompaniyasining Parijdagi ofisi mahalliy politsiya tomonidan tintuv qilindi. Bu haqda Parij prokuraturasi maʼlum qildi.

Rasmiy maʼlumotga koʻra, tergov quyidagi jinoyatlar boʻyicha olib borilmoqda:

• bolalarga nisbatan jinsiy zoʻravonlik tasvirlarini saqlash va tarqatishga sheriklik qilish;
• deepfake texnologiyalari orqali shaxslarning roziligisiz jinsiy tasvirlar yaratish;
• insoniyatga qarshi jinoyatlarni inkor etish.

Ilon Mask va X kompaniyasining sobiq rahbari Linda Yakkarino aprel oyida oʻtkazilishi rejalashtirilgan sud majlisiga chaqirilgan.

Mask ijtimoiy tarmoqlarda bu holatni “siyosiy hujum” deb baholab, Fransiya rasmiylari bunday tekshiruvlar oʻrniga jinsiy jinoyatchilarga qarshi kurashga eʼtibor qaratishi lozimligini bildirgan.

Xalqaro tekshiruvlar kuchaymoqda

Soʻnggi kunlarda bir qator Yevropa davlatlari va Avstraliya ham X platformasiga nisbatan tekshiruvlar boshlagan. Bunga platformaning sunʼiy intellekt chat-boti Grok foydalanuvchi soʻrovlariga javob sifatida ayollar va bolalarning shahvoniy tasvirlarini taqdim etgani sabab boʻlgan.

Avstraliyaning kiberxavfsizlik boʻyicha komissari Juli Inman Grant Guardian nashriga bergan intervyusida bu jarayonni “burilish nuqtasi” deb atadi. Uning taʼkidlashicha, jahon hamjamiyati bolalarga nisbatan jinsiy zoʻravonlik materiallari yaratishi mumkin boʻlgan texnologiyalarga qarshi qatʼiy pozitsiyani shakllantirmoqda.

Muallif: Isomiddin Jumanazarov