Ukrainada Starlink faoliyati cheklandi

SpaceX  harakatlanayotgan Starlink terminallari faoliyati tezligini cheklagan. Cheklov soatiga 100 milya, ya’ni taxminan 160 kilometrdan yuqori tezlikda harakatlanishda kuchga kiradi.

Ukraina mudofaa kuchlari bu cheklov haqida oldindan ogohlantirilmagan. Buning oqibatida bir qator harbiy vazifalar bajarilmay qolgan. U ushbu chorani o‘sha paytdagi siyosiy vaziyat bilan bog‘liq bo‘lishi mumkinligini taxmin qildi.

Ukrainaning sobiq mudofaa vaziri Mixail Fedorov chorshanba kuni kechga borib xizmat faoliyati qisman tiklanganini bildirdi. U Starshield tezligiga qo‘yilgan cheklovlarni to‘liq bekor qilish Ukraina mudofaasi uchun muhimligini ta’kidlab, Ilon Maskka minnatdorlik bildirdi va undan keyingi yordamni so‘radi.

Taxminan bir soat o‘tib, Mask ushbu murojaatga javob berdi.

«Starshield tizimlari AQSh hukumatiga tegishli va uning tomonidan boshqariladi. Tezlik yoki foydalanishga oid har qanday cheklovlarni Amerika harbiylari va yakunda AQSh prezidenti belgilaydi», deb yozdi u.

Maskning qo‘shimcha qilishicha, Starlink fuqarolik yoki mudofaa faoliyati uchun mo‘ljallangan va hujumkor harbiy amaliyotlarda ishlatilmasligi kerak. Uning fikricha, bunday foydalanish tijoriy kompaniya uchun nomaqbul bo‘ladi.

AQSh hukumati bu borada rasmiy izoh bermadi. Biroq Axios nashriga ismi oshkor etilmagan yuqori martabali amerikalik amaldor Vashingtonning Ukrainadagi Starlink faoliyatini cheklashga aloqasi yo‘qligini aytdi.

Ukraina Mudofaa vazirligi vakillari esa jurnalistlarga SpaceX terminallar tezligini soatiga 161 kilometr darajasida cheklashda davom etayotganini ma’lum qildi. Shu bilan birga, ularning qayd etishicha, soatiga 160 kilometrgacha bo‘lgan tezlikda aloqa sifati yaxshilangan.

Starlink va Starshield ikkalasi ham Maskka tegishli SpaceX kompaniyasiga qarashli. Biroq Starlink asosan fuqarolik maqsadlarida, jumladan, olis hududlarda internet bilan ta’minlash uchun xizmat qiladi. Starshield esa davlat idoralari va harbiy tuzilmalar ehtiyojlariga mo‘ljallangan.

13-oktabr kuni Ukraina prezidenti Volodimir Zelenskiy NPR nashriga bergan intervyusida Donald Tramp ma’muriyati Kiyev Rossiya neftni qayta ishlash zavodlariga zarba berishni to‘xtatmasa, AQSh Ukraina bilan razvedka ma’lumotlarini almashishni to‘xtatishi mumkinligi haqida ogohlantirganini aytdi.