Oʻzbekistonlik yozuvchi Hamid Ismoilov 2026-yilgi Nobel mukofotining nomzodlar roʻyxatiga kirdi

Oʻzbekistonlik yozuvchi Nobel mukofotiga ega boʻlishi mumkinmi? Rasman buni hech kim tasdiqlay olmaydi — chunki sir 50 yil saqlanadi. Lekin bir roʻyxatda uning ismi Haruki Murakami va Joan Rouling bilan yonma-yon turibdi.

Roʻyxatda Ismoilovdan tashqari, Haruki Murakami, Margaret Etvud, Salmon Rushdi, Devid Grossman, Joan Rouling, Stiven King kabi jahonga mashhur mualliflar ham bor.

Nobel mukofotining oʻziga xos jihatlaridan biri shundaki, adabiyot boʻyicha nomzodlar va ularni koʻrsatgan shaxslar haqidagi maʼlumotlar 50 yil davomida maxfiy saqlanadi. Nobel mukofotining rasmiy bazasida ham yangi nomzodlar haqidagi maʼlumotlar shu muddat oʻtgachgina ochiqlanishi qayd etilgan. Shu bois hozirgi paytda Hamid Ismoilovning 2026-yilgi mukofot uchun rasman koʻrsatilganini tasdiqlashning imkoni yoʻq.

Hamid Ismoilov oʻzbek va rus tillarida ijod qiladi, asarlari ingliz, turk, nemis, fransuz tillariga tarjima qilingan. U 2019-yilda «The Devil's Dance» («Jinlar bazmi») romani uchun EBRD adabiyot mukofotiga sazovor boʻlgan. Uning «We Computers» asari esa 2026-yilgi EBRD adabiyot mukofoti qisqa roʻyxatiga kiritilgan.

Taniqli oʻzbek shoiri, yozuvchisi va jurnalisti Hamid Ismoilov 1954-yil 5-mayda Qirgʻizistonning Frunze (hozirgi Chuy) viloyati Toʻqmoq shahrida tugʻilgan. Ismoilov harbiy aloqa bilim yurtini, keyinchalik Toshkent davlat universitetining (hozirgi OʻzMU) bir nechta fakultetlarini (biologiya, huquq, menejment) tamomlagan.

1992-yilda Ismoilov Oʻzbekistondan chiqib ketgan, shundan beri u Londonda yashab keladi. 2006-yilda uning «Temir yoʻl» romani taniqli yozuvchi Robert Chandler tomonidan ingliz tiliga tarjima qilinib, Londonda nashr etildi. Hamid Ismoilov sheʼrlari Ingeborga Baldauf va Zigrid Kleynmixel tomonidan nemis tiliga tarjima qilingan.

2026-yilgi adabiyot boʻyicha Nobel mukofoti 8-oktyabr kuni Stokgolmda eʼlon qilinadi. Gʻolibga 12,0 million shved kronasi (taxminan, 1,2 million dollar) topshiriladi.