Shifokorlarga tushunarsiz yozish taqiqlandi

Hindistonda shifokorlarga dorinoma tushunarsiz tarzda yozish taqiqlandi. Panjob va Haryana Oliy sudi shifokorlar tashxis, dorinoma (retsept) va tibbiy maʼlumotnomalarni oʻqish mumkin boʻlgan tarzda yozishlari shart deb hukm chiqardi.

Shifokorlarga dorinoma yoki maʼlumotnomalarni katta harflarda yoki raqamli muhitda tayyorlash zarurligi bildirildi. Shuningdek, mazkur masalada davlat tibbiyot muassasalariga koʻrsatmalar berildi. Endilikda shifokorlarning husnixatlari nazorat qilinadi. BBC nashrining xabar berishicha, tibbiyot fakulteti talabalariga ham yozuvlarini rivojlantirishga oid darslar qoʻshish tavsiya qilindi. Raqamli dorinomalarni ommalashtirish uchun ikki yillik oʻtish davri koʻzda tutilgan.

Qarorni eʼlon qilgan sudya Jasgurprit Singx Puri ayrim tibbiy maʼlumotnomalarni koʻzdan kechirganida birorta ham soʻzini oʻqiy olishmagani, bu holat sudning vijdonini uygʻotadigan darajada ekanini aytdi.

Shifokorlar esa, qattiq ish surʼati yomon husnixatga olib kelayotganini bildirgan boʻlsa, mutaxassislar oʻqib boʻlmaydigan dorinomalar faqat estetik muammo emas, balki bemor xavfsizligi uchun jiddiy tahdid ham ekanini eslatdi.