Ukraina Rossiyaning qariyb 1000 kvadrat metr hududini nazorat ostiga oldi

Kursk viloyati gubernatori vazifasini bajaruvchi Aleksey Smirnov dushanba kuni mintaqadagi 28 ta aholi punkti Ukraina Qurolli kuchlari nazorati ostida ekanini aytgan.

Ukraina prezidenti Volodimir Zelenskiy Telegram kanalida Ukraina Ichki ishlar vaziri va Xavfsizlik xizmatiga operatsiya oʻtkaziladigan hudud uchun gumanitar yordam rejasini tayyorlash topshirilganligini maʼlum qildi.

"Biz Rossiya Putin davrida qanday harakat qilayotganini koʻryapmiz: 24 yil oldin “Kursk” falokati yuz berdi, bu uni hukmronligining ramziy boshlanishi edi. Putinning davri Kursk bilan boshlandi, Kursk bilan tugaydi", — dedi Ukraina rahbari Volodimir Zelenskiy.

Rossiya prezidenti Vladimir Putin esa Ukraina bilan chegaradosh hududlardagi vaziyat boʻyicha yigʻilish oʻtkazdi.

Ushbu yigʻilishda Putin Mudofaa vazirligi dushmanni Rossiya hududlaridan haydab chiqarishi va chegara xizmati bilan birgalikda mamlakat chegarasining ishonchli himoyasini taʼminlashi  haqida gapirib, Kiyev rejimi Moskva va vositachilarning tinchlik takliflarini nega rad etganini Kursk viloyatidagi vaziyat koʻrsatadi deya taʼkidladi.

Shuningdek, Rossiya prezidenti Kursk viloyatidagi voqealardan soʻng Rossiya qoʻshinlarining front chizigʻi boʻylab oldinga siljish tezligi  1,5 barobarga oshganligini aytdi.