“Butun Livan yonishi, minglab livanlik onalar yig‘lashi kerak” — Itamar Ben Gvir

Isroil harbiylarining ma’lum qilishicha, askarlar Livandagi operatsiya vaqtida ularning tankiga berilgan zarba oqibatida “jangda” halok bo‘lgan.

Halok bo‘lganlardan biri 401-zirhli brigadaning 52-batalyoni qo‘mondoni, 32 yoshli podpolkovnik Dor Gedaliya Ben Simxon ekani aytildi.

Isroil Mudofaa kuchlari tunda Livan janubi bo‘ylab “Hizbulloh” jangarilari va infratuzilmasini nishonga olib, zarbalar berganini ma’lum qildi. Bugun ertalab holatiga ko‘ra, zarbalar oqibatida 18 kishi halok bo‘lgan.

“Isroillik onaning har bir tomchi ko‘z yoshi uchun minglab livanlik onalar yig‘lashi, butun Livan yonishi kerak!”, — deb yozdi Itamar Ben-Gvir X’dagi postida.

“Yetar endi, bu “ping-pong”ni bas qiling. Yaqin Sharqda vazminlik va bosiqlik bilan g‘alaba qozonib bo‘lmaydi — bu yerda g‘azablanish kerak. Yo‘q qilib tashlash shart. Terrorni yanchib tashlang”, — degan u post oxirida.

Harakatlar AQSH-Eron kelishuviga zid

Bu voqea AQSH va Eron rahbarlari Eron urushini tugatishga qaratilgan dastlabki kelishuvni imzolaganidan bir necha kun o‘tib yuz berdi.

Vaqtinchalik kelishuv shartlariga ko‘ra, har ikki tomon va ularning ittifoqchilari barcha harbiy harakatlarni, jumladan, Livandagi harakatlarni ham to‘xtatishi shart.

“Amerikaliklarni hurmat qilgan holda aytamanki, Isroil butun dunyoga farzandlarimiz qoni va fuqarolarimiz xavfsizligi qurbon qilinmasligini aniq-ravshan bildirib qo‘yishi kerak”, - dedi Ben-Gvir.

Ben-Gvir may oyida G‘azoga yordam yetkazishga uringan “Global Sumud flotiliyasi”ning hibsga olingan faollarini masxara qilayotgani aks etgan videolavhani e’lon qilib, bahs-munozaralarga sabab bo‘lgan edi.

Videoda vazirning hibsga olinganlarni haqoratlab, Isroilning katta bayrog‘ini silkitayotgani, faollar esa qo‘llari orqasiga bog‘langan holda tiz cho‘kishga majburlangani aks etgan. “Isroilga xush kelibsiz, bu yerning xo‘jayinlari bizmiz” deydi u lavhada.

Avvalroq, Itamar Ben Gvirning Italiyani “shippaklar mamlakati”ga o‘xshatib kamsitgani haqida xabar bergandik.