Varshavada inson huquqlari bo'yicha yirik xalqaro konferensiya o'tkazilmoqda

Varshavada Warsaw Human Dimension Conference 2026 — inson huquqlari va demokratiyaga bag'ishlangan xalqaro konferensiya bo'lib o'tmoqda.

5–15-oktabr kunlari Polshaning Varshava shahrida o'tayotgan tadbirda YXHT hududidagi davlatlar, xalqaro tashkilotlar, fuqarolik jamiyati, huquq himoyachilari va jurnalistlar ishtirok etmoqda. Konferensiyaga 1 800 dan ortiq kishi qatnashmoqda.

Tadbir Shveysariyaning 2026-yildagi YXHT raisligi tomonidan YXHTning Demokratik institutlar va inson huquqlari bo'yicha byurosi (ODIHR) ko'magida tashkil etilgan. Unda inson huquqlari, qonun ustuvorligi, media erkinligi, demokratik saylovlar, gender tengligi, yig'ilish va birlashish erkinligi hamda kamsitishlarga qarshi kurash kabi masalalar muhokama qilinmoqda.

7-oktabr kuni konferensiya doirasida tinch namoyishlar va inson huquqlari himoyachilarini kuzatish masalasi ham muhokama qilinadi. Unda sun'iy intellekt, tasvirlarni avtomatik tahlil qilish va ma'lumotlarni qayta ishlash texnologiyalarining fuqarolik makoniga ta'siriga e'tibor qaratiladi.

Shuningdek, bugungi dasturda sun'iy intellekt, ijtimoiy tarmoqlar va tijoriy manfaatlarning yoshlarning onlayn hayotiga ta'siriga bag'ishlangan maxsus interaktiv tadbir ham o'tkazilmoqda.

Konferensiya 15-oktabrgacha davom etadi.