Putin NATO bilan qarama-qarshilikda hech qachon yutmasligini biladi – Mark Ryutte

Rossiya NATOni agar G‘arb alyansi Boltiq bo‘yidagi eksklav – Kalingradni qurshab olishga urinsa, yadroviy arsenalni ham o‘z ichiga olgan jamiki qurol-yarog‘laridan foydalanishga shayligidan ogohlantirdi. Bu haqda NATOga a’zo davlatlarga yuborilgan diplomatik hujjatda aytilgan.

30-sentyabr kuni yuborilgan diplomatik memorandumda ta’kidlanishicha, Moskva NATO Kaliningradga havo va dengiz blokadasi tayyorlayotgani haqida ma’lumotga ega.

Bu da’voga NATO Bosh kotib Mark Ryutte javob qaytardi. U NATO mudofaa alyansi ekanini aytib, Rossiyani yadroviy tahdidlarni to‘xtatishga chaqirdi va ushbu hujjat vaziyatni ijobiy tarafga o‘zgartirmasligini ta’kidladi.

Shuningdek, Rutte tahdidning jiddiyligini past baholadi. Uning aytishicha, Vladimir Putin NATO bilan to‘g‘ridan-to‘g‘ri qarama-qarshilikda “hech qachon g‘alaba qozona olmasligini biladi”.

Polsha va Litva bilan chegaradosh bo‘lgan Kaliningrad Rossiyaga tegishli hudud bo‘lib, Boltiq dengizi bo‘yida joylashgan. Mintaqa Rossiyaning muhim harbiy tayanch hududi hisoblanadi. Bu yerda Rossiyaning Boltiq floti hamda yadroviy kallaklarni olib yurishga qodir “Iskander” raketa tizimlari joylashtirilgan.

Rossiya Ukrainaga qarshi keng ko‘lamli urush boshlanganidan beri bu keskinlik qo‘shni davlatlarga ham ta’sir ko‘rsatmoqda.

So‘nggi haftalarda Rossiya samolyotlari havo hududiga kirib kelgani haqidagi xabarlardan keyin Polsha havo mudofaasini kuchaytirdi. Daniya rasmiylari esa ikki hafta avval Rossiya harbiy kemasi Boltiq dengizi ustida Daniya harbiy vertolyoti yaqinida ikkita signal raketasini otganini ma’lum qildi.