Jaziramada energiya resurslaridan oqilona foydalanish boʻyicha tavsiyalar

Energetika vazirligi jazirama kunlarda yongʻin keltirib chiqaruvchi omillarni oldini olishga qaratilgan va energiya resurslaridan oqilona foydalanish boʻyicha tavsiyalar berdi.

➖ Elektr uskunalarini nazoratsiz qoldirmang. Xonadan uzoq vaqtga chiqishda barcha qurilmalarni tarmoqdan uzib qoʻying.

➖ Eski yoki nosoz simlardan foydalanmang. Ular yongʻin kelib chiqishi va energiya resursini ortiqcha sarflanishiga sabab boʻladi. Simlar izolyatsiyasi buzilgan boʻlsa, yangisiga almashtiring.

➖ Bitta rozetka (pilot)ga koʻp elektr jihozlarini ulamang. Yuklama ortishi simlarni qizitib, yongʻinga sabab boʻlishi mumkin.

➖ Quritgich, dazmol, mikrotoʻlqinli pech, ventilyator kabi qurilmalardan foydalanayotganda ularni nazoratsiz qoldirmang. Qizib ketgan qurilma yongʻin kelib chiqish xavfini tugʻdirishi mumkin.

➖ Konditsionerni 20–25°S oraligʻida ishlating. Haddan tashqari past haroratga qoʻyish nafaqat elektr energiyasi sarfini oshiradi, balki inson sogʻligi uchun ham zararli hisoblanadi.

➖ Foydalanilmayotgan qurilmalarni toʻliq tarmoqdan uzib qoʻying. Bu ham yongʻin kelib chiqishining oldini olish va energiya sarfini kamaytirishga xizmat qiladi.

➖ Konditsioner filtrlarini tozalab turing. Bu ham energiya samaradorlikni oshiradi va yongʻin kelib chiqishining oldini oladi.

➖ Oʻt oʻchirgich (ognetushitel) va signalizatsiya vositalarining soz holda ekanligini tekshirib turing. Favqulodda holatlarga tayyor boʻlish muhim.

➖ Elektr qurilmalari va jihozlarini muntazam texnik koʻrikdan oʻtkazing.

➖ Elektr ustunlari yoki simlar yaqinida olov yoqmang. Elektr tarmoqlariga yaqin hududlarda quruq oʻtin, qamish yoki xas-xashak yoqish bilan bogʻliq ishlarni amalga oshirish qatʼiyan man etiladi.

➖ Ishxona va ofislarda xodimlarga yongʻin xavfsizligi boʻyicha muntazam oʻquvlar tashkil qiling.

➖ Muqobil energiya manbalari, yaʼni quyosh panellaridan foydalanish choralarini koʻrish tavsiya etiladi.

➖ Avtomobillarga yoqilgʻi quyish shoxobchalari neft mahsulotlari toʻldirilgan sisternalarning xavfsizligini nazorat qilish, «metan zapravkalar»da esa gaz sizib chiqish va portlash xavfini keltirib chiqaruvchi omillarga yoʻl qoʻymaslik talab etiladi.

➖ Tez alanga oluvchi narsalarni elektr qurilmalari yaqinida saqlamang. Qamish, qurigan oʻt, mato va shunga oʻxshash tez yonuvchi buyumlar shamolda uchib borib uskunalarga tushishi va yongʻin keltirib chiqarishi mumkin.

➖ Elektr taʼminotidagi qisqa muddatli oʻchish holatlari xavfsizlik uchun qilinadi. Noqulay ob-havo sharoitlari va texnogen vaziyatlarda yuqori koʻlamli avariyaviy hamda yongʻin chiqishi holatlarining oldini olish, elektr qurilmalari sozligini taʼminlash maqsadida ayrim havo uzatish tarmoqlari yoki transformatorlar avtomatik ravishda yoxud qoʻlda oʻchiriladi. Bu noxushlik emas, balki ehtiyot chorasidir.

➖ Elektr tarmoqlarida nosozliklar yoki uzilishlar yuzaga kelsa, darhol 1154 qisqa raqamiga xabar bering.

Unutmang, vaqtida koʻrilgan ehtiyot chorasi – koʻngil xotirjamligi hamda xavfsizlik kafolatidir.