Koʻkdaladagi gaz “zapravka”ning portlashiga rahbar sabab boʻlgan

Texnikaviy nosozlik va xavfsizlik qoidalari buzilgan

“Hududgaztaʼminot” AJ gaz toʻldirish inshootlarini ishlatish boshqarmasi bosh mutaxassisi Hasanjon Rahmonovning maʼlum qilishicha, portlash yuz bergan korxona tadbirkor tomonidan xususiy sheriklik asosida ishga tushirilgan boʻlib, u yerda texnologik jarayonlar qoidalarga zid ravishda amalga oshirilgan.

“Sigʻimlardagi nafas olish klapanlari nosoz holatda ishlagan, korxona rahbari esa mutaxassis chaqirmasdan qurilmani oʻzi ishga tushirgan. Natijada bosim belgilangan meʼyordan oshib ketgan, klapanlar ochilmay qolgan. Shuningdek, jihozlar oʻz vaqtida davlat texnik koʻrigidan oʻtkazilmagan”, — dedi Rahmonov.

Mutaxassisning taʼkidlashicha, xavfli ishlab chiqarish obʼektlarida barcha uskuna va jihozlar belgilangan muddatlarda koʻrikdan oʻtkazilishi shart, ammo mazkur korxona rahbari bu talabni bajarmagan.

Rasmiy maʼlumotga koʻra, “zapravka”da gaz ballonlarini toʻldirish ishlari yozning eng issiq vaqtida amalga oshirilgan.

“Hududgaztaʼminot” tomonidan ish jarayonlarini issiq vaqtda amalga oshirmaslik haqida koʻrsatma berilgan boʻlsa-da, korxona rahbari bu ogohlantiruvga eʼtiborsizlik bilan qarab, ishni davom ettirgan”, — dedi Rahmonov.

Hodisa yuzasidan jinoyat ishi qoʻzgʻatilib, sud-tibbiy, kimyoviy, biologik, kriminalistik va yongʻin-texnika ekspertizalari tayinlangan.

Rasmiy maʼlumotlarga koʻra, portlash natijasida dastlab 4 kishi halok boʻlgan, 15 kishi jarohatlangan. Halok boʻlganlar oilalariga 100 million soʻmdan, jarohatlanganlarga esa 50 million soʻmdan moddiy yordam koʻrsatilgan.