Meva-sabzavot va oziq-ovqat mahsulotlari eksporti 3,5 milliard dollarga yetkaziladi

Farmonga koʻra, 2025–2027 yillarda meva-sabzavot va oziq-ovqat mahsulotlari eksportini jadal rivojlantirish hamda qoʻshilgan qiymat zanjirini yaratish maqsad qilingan.

Asosiy koʻrsatkichlar:

2026 yilda eksport hajmi 3,5 mlrd dollarga, 2027 yilda esa 4 mlrd dollarga yetkaziladi;

Tabiiy gaz bilan taʼminlangan issiqxonalarda mahsulot yetishtirish hajmi 2026 yilda 620 ming tonna, 2027 yilda 670 ming tonna boʻladi;

Issiqxona mahsulotlari eksporti ulushi 30 foizdan 70 foizgacha oshiriladi;

2026 yilda 20 ming gektar, 2027 yilda 15 ming gektar maydonga meva va sabzavot koʻchatlari ekiladi.

Beriladigan imtiyozlar:

2026 yil 1 yanvardan 2028 yil yakunigacha ijtimoiy soliq stavkasi 1 foiz etib belgilanadi;

2025 yil 1 oktabr holatigacha boʻlgan soliq qarzlari foizsiz 2028 yil oxirigacha uzaytiriladi;

Maʼmuriy va moliyaviy jarimalar hamda hisoblangan penyalar bekor qilinadi;

Inkasso topshiriqnomalari qaytarib olinadi;

Issiqxona yerlari uchun soliq qishloq xoʻjaligi yerlari stavkalari boʻyicha hisoblanadi;

Yer fondi toifasini oʻzgartirmasdan issiqxona infratuzilmasi obʼektlarini qurishga ruxsat beriladi (qozonxona, qadoqlash sexi va boshqalar).

Qoʻshimcha qoʻllab-quvvatlov:

Issiqlik va sovitish xizmatlari uchun xarajatlarning 50 foizi miqdorida imtiyozli kreditlar (yillik 14%) ajratiladi;

Energiya samaradorligi uskunalari oʻrnatish xarajatlarining 20 foizi davlat jamgʻarmasi hisobidan qoplab beriladi.