Britaniyalik pop yulduzi Dua Lipa Samsung kompaniyasini sudga berdi

Dua Lipa televizorlarni reklama qilishda sur’atidan ruxsatsiz foydalanganlikda ayblab, Janubiy Koreya texnologiya gigantidan kamida 15 million dollar tovon puli talab qilmoqda.

Da’vo arizasida ta’kidlanishicha, “Samsung” chakana savdo uchun mo‘ljallangan televizor qutilarining old tomoniga pop yulduzining mualliflik huquqi bilan himoyalangan rasmini joylashtirgan. Bu esa go‘yoki xonanda mahsulotni ma’qullagandek taassurot uyg‘otgan, natijada kompaniya foyda ko‘rgan.

Lipa advokatlari da’vo arizasiga ijtimoiy tarmoqlardagi xabarlar va izohlarning skrinshotlarini ilova qilib, qutilar sirtidagi pop-yulduz tasviri xaridorlarni mahsulotni sotib olishga undaganini ta’kidladi. Skrinshotlardan birida muxlisning “faqat Dua borligi uchungina” televizorni xarid qilganini aytgan izohi ham bor.

Qo‘shiqchi o‘tgan yilning iyun oyida Samsung uning huquqlarini poymol qilganidan xabar topgan va kompaniyadan o‘z tasviridan foydalanishni bas qilishni talab qilgan. Biroq elektronika ishlab chiqaruvchisi bu talabni bir necha bor rad etgan, deydi uning advokatlari.