Mirziyoyev ikki nafar hokim oʻrinbosarini ishdan boʻshatdi

Yigʻilishda bayon qilinishicha, Toshkent viloyatida qishloq yerlari Andijondan 1,5 karra koʻp. Lekin, yetishtiriladigan mahsulot hajmi bir xil. Viloyatda 1 gektardan oʻrtacha daromad Andijondan 2 karra, Namangan va Fargʻonadan 1,5 baravar, Buxorodan 1,3 baravarga kam. 

Soʻnggi uch yilda viloyatdagi 21 ming gektar yer dehqonchilik uchun 51 ming nafar aholiga berildi. Lekin, yil boshidan bor-yoʻgʻi 72 mln dollarlik meva-sabzavot eksport boʻldi. Bu — oʻtgan yilgidan kam. 

Viloyatdagi samarasiz 2 200 gektar bogʻ va tokzor hisobiga yiliga 10 mln dollar eksport yoʻqotilyapti. Suv tejovchi texnologiya boʻyicha Toshkent viloyati eng oxirgi oʻrinlarda. 

Bu borada viloyat hokimining qishloq xoʻjaligi boʻyicha birinchi oʻrinbosari Botir Alimbekov Toshkent viloyati qishloq xoʻjaligidagi imkoniyatlardan foydalana olmagani, tayyor qilib berilgan tizimni ishlata olmagani uchun lavozimidan ozod etildi. 

Bundan tashqari, Shavkat Mirziyoyev viloyatda "Kambagʻallikdan farovonlik sari" dasturi doirasida 116 ming aholini kambagʻallikdan olib chiqish boʻyicha qilinayotgan ishlarni qoniqmagan.

"Bor imkoniyatlar va yaratib berilayotgan sharoitlar hisobiga viloyatda kambagʻal oila qolishining oʻzi uyat", deydi Prezident.

Mirziyoyev viloyatda mavjud boʻlgan 12 ming vakant oʻrnining 2 mingtasi obodonlashtirish, gul ekish, koʻcha supurish kabi malaka talab etilmaydigan mehnatga mansub, lekin viloyatda ish izlab yurgan 2 ming aholini bunga jalb qilish oʻrniga, ularga har yili 4 milliard soʻm ishsizlik nafaqasi toʻlab kelinayotganini tanqid qilgan. 

Shu sababli oʻz faoliyatidagi kamchiliklar va sohadagi ishlarni qoniqarsiz olib borayotgani uchun viloyat hokimining birinchi oʻrinbosari E. Muhitdinov lavozimidan ozod qilingan.