Мирзиёев икки нафар ҳоким ўринбосарини ишдан бўшатди

Йиғилишда баён қилинишича, Тошкент вилоятида қишлоқ ерлари Андижондан 1,5 карра кўп. Лекин, етиштириладиган маҳсулот ҳажми бир хил. Вилоятда 1 гектардан ўртача даромад Андижондан 2 карра, Наманган ва Фарғонадан 1,5 баравар, Бухородан 1,3 бараварга кам. 

Сўнгги уч йилда вилоятдаги 21 минг гектар ер деҳқончилик учун 51 минг нафар аҳолига берилди. Лекин, йил бошидан бор-йўғи 72 млн долларлик мева-сабзавот экспорт бўлди. Бу — ўтган йилгидан кам. 

Вилоятдаги самарасиз 2 200 гектар боғ ва токзор ҳисобига йилига 10 млн доллар экспорт йўқотиляпти. Сув тежовчи технология бўйича Тошкент вилояти энг охирги ўринларда. 

Бу борада вилоят ҳокимининг қишлоқ хўжалиги бўйича биринчи ўринбосари Ботир Алимбеков Тошкент вилояти қишлоқ хўжалигидаги имкониятлардан фойдалана олмагани, тайёр қилиб берилган тизимни ишлата олмагани учун лавозимидан озод этилди. 

Бундан ташқари, Шавкат Мирзиёев вилоятда "Камбағалликдан фаровонлик сари" дастури доирасида 116 минг аҳолини камбағалликдан олиб чиқиш бўйича қилинаётган ишларни қониқмаган.

"Бор имкониятлар ва яратиб берилаётган шароитлар ҳисобига вилоятда камбағал оила қолишининг ўзи уят", дейди Президент.

Мирзиёев вилоятда мавжуд бўлган 12 минг вакант ўрнининг 2 мингтаси ободонлаштириш, гул экиш, кўча супуриш каби малака талаб этилмайдиган меҳнатга мансуб, лекин вилоятда иш излаб юрган 2 минг аҳолини бунга жалб қилиш ўрнига, уларга ҳар йили 4 миллиард сўм ишсизлик нафақаси тўлаб келинаётганини танқид қилган. 

Шу сабабли ўз фаолиятидаги камчиликлар ва соҳадаги ишларни қониқарсиз олиб бораётгани учун вилоят ҳокимининг биринчи ўринбосари Э. Муҳитдинов лавозимидан озод қилинган.