Telegram va Instagramda “Musodara tovarlar” nomli soxta guruh egalari ushlandi

Bu haqda Toshkent viloyati IIBB matbuot xizmati xabar berdi.

Maʼlum qilinishicha, Toshkent viloyati IIBBning Axborot texnologiyalari sohasidagi jinoyatlarga qarshi kurashish boshqarmasi va uning quyi tizimlari tomonidan oʻtkazilgan navbatdagi tezkor-qidiruv tadbiri davomida Telegram va Instagram’da Davlat bojxona qoʻmitasi nomidan soxta kanal va guruhlar ochib, fuqarolarning pul mablagʻlarini oʻzlashtirib kelgan jinoiy guruh fosh etilgan.

Dastlabki surishtiruvlarga koʻra, Andijon viloyatida yashovchi 22–25 yoshli 5 nafar shaxs joriy yil boshida jinoiy reja tuzib, Telegram va Instagram ijtimoiy tarmoqlarida “Musodara tovarlar” hamda “Optom sklad” nomlari ostida kanal va guruhlar tashkil etgan. Shuningdek, ular “Bojxona qoʻmitasi admini”, “Ishonch siz bilan” kabi oʻnga yaqin soxta akkauntlar orqali oʻzlarini goʻyoki bojxona tizimi xodimlari sifatida tanishtirgan.

Jinoiy guruh aʼzolari maishiy texnika, muzlatgich va televizorlar, isitish qozonlari, oshxona va bolalar mebellari, turli gadjetlar, jumladan iPhone telefonlarining soʻnggi modellari hamda kiyim-kechaklarni juda arzon narxlarda taklif qilgan. Hatto aslida mavjud boʻlmagan moto-skuterlarni yetkazib berishni vaʼda qilgan. Toʻlov mablagʻlarining bir qismi esa oʻzga shaxslar nomiga rasmiylashtirilgan bank kartalari orqali qabul qilingan.

Natijada jinoiy guruh aʼzolari dastlabki tergovga qadar 60 nafar fuqaroning ishonchiga kirib, firibgarlik yoʻli bilan jami 117 million soʻm mablagʻni oʻzlashtirgan hamda pullarni shaxsiy ehtiyojlari uchun sarflab yuborgan. Mahsulotni talab qilgan yoki qayta aloqaga chiqqan jabrlanuvchilar esa javobsiz qoldirilib, ijtimoiy tarmoqlarda “qora roʻyxat”ga kiritilgan.

Mazkur holat yuzasidan jinoiy guruh aʼzolariga nisbatan Oʻzbekiston Respublikasi Jinoyat kodeksining 168-moddasi (firibgarlik) 3-qismi “b” va “g” bandlari bilan jinoyat ishi qoʻzgʻatilib, ularga nisbatan qamoq ehtiyot chorasi qoʻllanilgan. Hozirda tergov harakatlari davom ettirilib, fuqarolarga yetkazilgan moddiy zararni qoplash choralari koʻrilmoqda.