Namangan va Sirdaryoda gaz hamda elektrdan noqonuniy foydalanish holatlari fosh etildi

Yoqilgʻi-energiya resurslaridan noqonuniy foydalanish bilan bogʻliq holatlarni fosh etishga qaratilgan nazorat tadbirlari davom etmoqda.

Xususan, Namangan viloyatining Uchqoʻrgʻon tumanidagi “R.K.B” MChJ rahbari B.R. jamiyatga qarashli umumiy ovqatlanish shoxobchasida tabiiy gaz tarmogʻiga tijorat maqsadida oʻzboshimchalik bilan ulanib, 1,6 mlrd soʻmlik (552 ming kub metr) tabiiy gazni talon-toroj qilgani aniqlandi.

Mazkur holat yuzasidan jamiyat rahbari B.R. ga nisbatan Jinoyat kodeksining 169-moddasi 4-qismi “a” bandi bilan jinoyat ishi qoʻzgʻatilib, tergov harakatlari olib borilmoqda.

Shuningdek, “Oʻzenergoinspeksiya”ning Sirdaryo viloyati hududiy boshqarmasi tomonidan oʻtkazilgan nazorat tadbirida Sayxunobod tumanida “D. P. T.” MChJ elektr qurilmalarini oʻzboshimchalik bilan tarmoqqa ulab, elektr enegiyasidan noqonuniy foydalanganligi aniqlandi. 

Ushbu qoidabuzarlik natijasida dastlabki hisob-kitoblarga koʻra, elektr taʼminoti korxonasiga 1 mlrd 609 mln soʻmlik zarar yetkazilganligi maʼlum boʻldi.

Hozirda huquqni muhofaza qilish organlari tomonidan tergovga qadar tekshiruv ishlari olib borilmoqda.