Odamlarning “Amerika orzusi”ni amalga oshirmoqchi boʻlgan firibgarlar ushlandi

Maʼlum qilinishicha, Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida Toshkent shahrida tezkor tadbir oʻtkazilgan. Namangan shahrida yashovchi shaxs Surxondaryo viloyatining Oltinsoy tumanida istiqomat qiluvchi fuqaroni yuqori lavozimda ishlovchi tanishlari orqali “Toshkent-Istanbul-Madrid-Tixuana” yoʻnalishida Amerika Qoʻshma Shtatlariga yuborishni vaʼda bergan. Buning uchun zarur boʻladigan viza hujjatlarini rasmiylashtirib berish evaziga 334 mln soʻm olayotgan vaqtida ushlangan. 
 
DXX xodimlari tomonidan prokuratura hamda ichki ishlar organlari bilan hamkorlikda oʻtkazilgan tezkor tadbir natijasida aniqlanishicha, Toshkent viloyatining Chinoz tumanida yashovchi shaxs oʻzining yuqori lavozimda ishlovchi tanishlari orqali 3 nafar fuqaroni AQShga borishlari uchun ularning hujjatlarini rasmiylashtirish berishini aytgan. Viza olib berish berish evaziga 42 ming AQSh dollari talab qilib, oldindan 28 800 AQSh dollari olgan vaqtida ashyoviy dalillar bilan ushlangan. 
 
Yana bir holatda esa Samarqand shahrida yashovchi shaxs Navoiy shahrida istiqomat qiluvchi fuqaroning aldov yoʻli bilan ishonchiga kirib, uning nomiga viza va boshqa tegishli hujjatlarni rasmiylashtirib, “Turkiya-Yevropa davlatlari-Meksika” yoʻnalishida aylanma yoʻllar orqali Amerika Qoʻshma Shtatlariga yuborish evaziga 17 500 AQSh dollari talab qiladi. Ammo, u oldindan 6 ming AQSh dollari olgan vaqtida DXXning Navoiy viloyati boʻyicha boshqarmasi va Bosh prokuratura huzuridagi Departamentning hududiy boshqarmasi xodimlari tomonidan ashyoviy dalillar bilan ushlanadi. 
 
Bundan tashqari, Samarqand viloyatining Urgut tumanida yashovchi shaxsga Uchquduq tumanida istiqomat qiluvchi fuqaro Turkiya va Meksika davlatlari orqali Qoʻshma Shtatlarga yuborishni vaʼda bergan va u yerda ishga joylashtirish evaziga 19 ming AQSh dollari talab qilib, oldindan 6200 AQSh dollari olgan vaqtida ashyoviy dalillar bilan ushlangan. 
 
Sharof Rashidov tumanida istiqomat qiluvchi shaxs Jizzax shahrida istiqomat qiluvchi fuqaroni Qoʻshma Shtatlarga ishga yuborishni vaʼda qilib, bu kabi ishlarni qilishga vakolati boʻlmasada, dastlab, 2023 yilning aprel-may oylarida 14 300 AQSh dollarini oladi. Shundan keyin uni aylanma yoʻllar bilan Janubiy Afrika Respublikasiga yuborib, uni boshqa davlatda chorasiz holatda qoldiradi va vaziyatni oʻnglash, yaʼni uni Amerikaga oʻtkazish uchun uning otasidan qoʻshimcha 6700 AQSh dollari talab qiladi. DXX Jizzax viloyati boʻyicha boshqarmasi xodimlari tomonidan ichki ishlar organlari bilan hamkorlikda oʻtkazilgan tezkor tadbirda u soʻralgan pul mablagʻini olgan vaqtida ashyoviy dalillar bilan ushlanadi. 

Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qoʻzgʻatilib, tergov harakatlari olib borilmoqda.