1-oktabr. Bugundan o'zbekistonliklar hayotida nimalar o'zgaradi?

Toshkentda avtobus va metro qimmatlaydi, my.gov.uz orqali esa nomingizdagi SIM-karta va bank kartalarini ko'rish mumkin bo'ladi. Yana-chi?

Oʻzbekiston

01.10.2026, 15:12

Кириллчада

Ulashish:

Toshkentda avtobus va metro qimmatlaydi. Elektron to'lov 1 700 so'mdan 2 500 so'mga oshadi.
Avtobus uchun oylik abonement 250 ming so'm, avtobus + metro uchun 345 ming so'm bo'ladi. Talaba, o'quvchi, pensioner va nogironligi bo'lganlarga 50% chegirma bor.
Nomingizga nechta SIM-karta ochilganini my.gov.uz orqali ko'ra olasiz. Ishlatmaydigan raqamni yopish uchun ham onlayn ariza berish mumkin.
Nomingizga nechta bank kartasi ochilganini ham my.gov.uz orqali tekshirish mumkin.
Uyingiz yoki mashinangizni sotish, garovga yoki ipotekaga qo'yishga my.gov.uz orqali o'zingiz taqiq qo'ya olasiz.
Nomingizga notarius orqali biror ish rasmiylashtirilsa, my.gov.uz avtomatik xabar yuboradi.
Familiya, ism yoki tug'ilgan sanangiz o'zgarsa, har bir idoraga alohida borish shart bo'lmaydi. Ma'lumotlar davlat tizimlarida avtomatik yangilanadi.
Tadbirkorga jarima solinsa, uning 50%ini bir oy ichida to'lab, jarimani yopishi mumkin. Qolgan 50%i kechiriladi.
Jarimani birdaniga to'lash qiyin bo'lsa, tadbirkor uni 6 oyga bo'lib to'lashi mumkin.
Tadbirkordan undirilgan jarima sudda bekor qilinsa, pul 15 kun ichida qaytariladi.
Toshkentda jarima maydonchasiga tushgan mashinani chiqarish elektronlashadi. Ruxsatnoma QR-kod orqali beriladi, to'lov ham onlayn qilinadi.
500 ming nafar o'qituvchi, shifokor, davlat xizmatchisi, o'quvchi va talaba teatr, kino va konsertlarga bepul vaucher oladi.
Ijtimoiy reestrdagi 100 ming oilaning bittadan farzandiga ham teatr, kino va konsert uchun bepul vaucher beriladi.
Eksportchilar uchun bojxona rasmiylashtiruvi, fitosanitariya sertifikati, fumigatsiya va tovar kelib chiqishi sertifikati to'lovlari 30%ga kamayadi.
Voyaga yetmaganlar o'z huquqini himoya qilish uchun mustaqil sudga murojaat qilsa, davlat boji to'lamaydi.
Kichik va o'rta biznesning ayrim kreditlari bo'yicha foiz xarajatlarining bir qismi qoplab beriladi.
Ayrim tadbirkorlar 5 mlrd so'mgacha garovsiz kredit olishi mumkin bo'ladi.
Elektrotexnika korxonalari 5 mln dollargacha kreditni yillik 6%dan olishi mumkin.
Davlat tashkilotlari tovar yoki xizmat sotib olishdan oldin uning bozor narxini elektron tizim orqali tekshiradi.
Yangi qurilishga maxsus raqam berilmasa, qurilishni boshlashga ruxsat berilmaydi.
Yangi qurilishlarning raqamli pasporti bo'ladi. U orqali ob'ekt haqidagi ma'lumotlarni kuzatish mumkin.
Temir yo'lda ichki yuk tashish uchun buyurtmani Davlat xizmatlari markazi yoki my.gov.uz orqali berish mumkin bo'ladi.
Suv tejovchi texnologiyalar o'rnatilganini nazorat qilish uchun uskunalar QR-kod va GPS-trekker bilan belgilanadi.
Buxoroning tarixiy markazida elektrosamokat, elektroskuter, moped, rikша va ayrim boshqa transportlarda harakatlanish cheklanadi.
Andijonda xususiy tadbirkorlar import qilingan suyultirilgan gazni ballonlarda aholiga to'g'ridan-to'g'ri sotishi mumkin bo'ladi. Narxni tadbirkorning o'zi belgilaydi.
300 dan ortiq bozor va savdo majmuasini E-bozor tizimiga ulash boshlanadi. Unda manzil, bo'sh savdo joylari va ish vaqti haqida ma'lumot bo'ladi.
Davlat ulushi 50%dan yuqori kompaniyalarning qimmatli qog'ozlari Markaziy depozitariyda hisobga olinadi.
Raqobat bor sohalarda byudjetdan moliyalashtirilmaydigan yangi davlat muassasalarini ochish cheklanadi.
3 oktabrdan Toshkent viloyatida ichimlik suvi qimmatlaydi. Aksar hududlarda 1 kub suv 2912 so'mdan 3472 so'mga chiqadi.