25 sotix yerni 29 ming AQSh dollariga sotmoqchi boʻlgan mansabdor ushlandi

Buxoro viloyatining Gʻijduvon tumanida yer sotish bilan bogʻliq holat aniqlandi. Bu haqida «Xabar.uz»ga viloyat IIB axborot xizmati rahbari Shuhrat Jalolov maʼlum qildi.

Gʻijduvon tumanida tugʻilgan, hozirda Buxoro shahrida faoliyat olib boruvchi Klasterning boshliq oʻrinbosari M.T. boshqa bir fuqaro – R.Ch.ni aldab, moddiy manfaat topish payiga tushgan. U Kogon tumanining «Siyozpoyon» mahallasida joylashgan 49 yillik ijara shartnomasi asosida bogʻdorchilik faoliyati bilan shugʻullanishga moʻljallangan 25 sotix yer maydonini sotishga uringan. Sotish huquqi mavjud boʻlmasa-da, M.T. notarius orqali R.Ch. nomiga toʻliq rasmiylashtirib berishini aytgan. Uning ishonchiga kirib, oʻz «xizmat haqi»ni 29.000 AQSh dollariga tenglashtirgan va R.Ch.dan shuncha miqdorda pul talab qilgan. 

Buxoro viloyati Ichki ishlar boshqarmasi Tezkor qidiruv xizmati Jinoyat qidiruv boshqarmasi Korrupsiya hamda Iqtisodiy jinoyatlarga qarshi kurashish boʻlimi xodimlari tomonidan oʻrinbosarning yer maydonini noqonuniy sotish bilan bogʻliq firibgarligi fosh etilgan. M.T. talab qilingan pullardan 9 000 AQSh dollarini boʻnak (avans) sifatida olayotgan vaqtida qoʻlga olingan. 

Mazkur holat yuzasidan Oʻzbekiston Respublikasi Jinoyat kodeksining 168- moddasi (firibgarlik) bilan jinoyat ishi qoʻzgʻatilib, hozirgi kunda dastlabki tergov harakatlari olib borilmoqda.