Aeroport xorijliklardan pul olib kelgan IIV katta inspektori qoʻlga tushdi

Qayd etilishicha Buxoro viloyatida ishlovchi IIB xodimi oʻzining mansabdor tanishlari orqali Buxoro shahar ichki ishlar organlari faoliyatini muvofiqlashtirish boshqarmasi huzuridagi Tergov boʻlimi ish yurituvida boʻlgan jinoyat ishida gumonlanuvchiga nisbatan boʻlgan qismini harakatdan tugatishda yordam berishi evaziga 13 ming AQSh dollari olayotgan vaqtida ashyoviy dalillar bilan qoʻlga tushdi.

Boshqa bir holatda esa, Toshkent viloyati IIB qoʻriqlash boshqarmasi Angren shahar boʻlimi safdor xodimi boʻlinma komandiri oʻrinbosari bilan oʻzaro til biriktirib, xizmat mavqeidan foydalangan holda mansabdor tanishlari orqali  Oqqoʻrgʻon tumanida yashovchi fuqaroni qoʻriqlash boshqarmasiga ishga kiritib qoʻyish evaziga 1500 AQSh dollari talab qilib,  1000 AQSh dollari olayotgan vaqtida ashyoviy dalillar bilan qoʻlga tushdi.

Boshqa bir holatda esa, IIV Migratsiya va personallashtirish Departamenti “Toshkent” xalqaro aeroportida pasport-viza boʻlimi katta inspektori mansab vakolatidan foydalangan holda voyaga yetmagan shaxsning xorijga chiqish biometrik pasportiga uni xorijga olib chiqib ketayotgan fuqaroga hamrohlik qiluvchi shtamp belgisini tezlashtirilgan tartibda rasmiylashtirib berish evaziga 400 AQSh dollarini pora sifatida olgan vaqtida ashyoviy dalillar bilan qoʻlga olindi.

Maʼlum boʻlishicha, katta inspektor 2025 yil boshidan shu davrga qadar Oʻzbekiston Respublikasida boʻlib turgan 42 nafar chet el fuqarolarining har birida 300-700 AQSh dollari miqdori pullarni olib, ularga chiqish vizasini hamda 8 nafar Oʻzbekiston fuqarolariga hamrohlik qiluvchi shtamp belgisini tezlashtirilgan tartibda rasmiylashtirib berish evaziga 200-400 AQSh dollari miqdoridagi pullarni pora sifatida olganlik holatlari ham aniqlandi.

“Hozirda ushbu qonun himoyachilariga nisbatan jinoyat ishlari qoʻzgʻatilib, qamoq ehtiyot chorasi qoʻllanildi. Tergov harakatlari olib borilmoqda”,  — deyiladi xabarda.