Angrendagi YTHda halok boʻlgan soni 13 kishini tashkil etmoqda

7 sentabr kuni Angrenda sodir boʻlgan YTH yuzasidan Fargʻona viloyati hokimi Xayrullo Bozorovning farmoyishi qabul qilindi. Biroq farmoyish e-qaror.gov.uz platformasida shaxsga doir maʼlumotlar borligi vaji bilan yopib qoʻyilgan.

Daryo.uz nashri xabar qilishicha, hokim farmoyishida YTH oqibatida 11 kishi halok boʻlgani keltirilgan. Unga koʻra, 9 sentabrda imzolangan farmoyishda 6 kishi turli darajada tan jarohatlari olib shifoxonaga joylashtirilgani qayd etilgan.

Shuningdek, hujjatda viloyat hokimi oʻrinbosarlari va tegishli tashkilotlar YTH oqibatida vafot etganlarning shaxsiga aniqlik kiritishi, ularning oila aʼzolariga hamda jabrlanganlarga tibbiy, moddiy, psixologik va boshqa yordamlar koʻrsatishi belgilangan. Halok boʻlganlarning dafn marosimlari bilan bogʻliq kompleks chora-tadbirlar amalga oshirilishi qayd etilgan. Jarohat olganlarga Angren shahar tibbiyot birlashmasida zarur tibbiy yordam koʻrsatilayotgani bildirilgan.

Kun.uz’ning ichki ishlar organlaridagi manbasiga koʻra esa bugunga kelib ushbu YTH oqibatida vafot etganlar soni 13 kishiga yetgan.

Eslatib oʻtamiz, 7 sentabr kuni soat 12:20 atrofida Qamchiq dovonidan Angren shahriga kirib kelish joyida dahshatli avariya roʻy bergandi: sement tashuvchi Shacman rusumli yuk avtotransporti boshqaruvni yoʻqotib, harakat yoʻnalishidagi temiryoʻl kesishmasida toʻxtab turgan ikkita yuk avtomashinasi hamda beshta yengil avtotransport vositalari bilan toʻqnashib, yoʻl transport hodisasini sodir etgan. IIV hodisa oqibatida 7 nafar fuqaro voqea joyida vafot etganini, turli tan jarohatlari olgan 5 nafar fuqaro tibbiyot muassasalariga yotqizilganini hamda 4 nafar fuqaroga tibbiy yordam koʻrsatilib, uylariga javob berilganini maʼlum qilgandi.