Qachongacha Oʻzbekiston bolalari yoʻllarda o'lishda davom etadi?! — Rasul Kusherboyev

Unda qayd etilishicha, voqea 07:45 larda Toshkent viloyati Yuqori Chirchiq tumanida joylashgan 14-sonli maktab qarshisida sodir boʻlgan. Shu yoʻl boʻylab harakatlanib kelayotgan "Cobalt" rusumli avtomashina haydovchisi piyodalar oʻtish joyidan kesib oʻtayotgan 11 yoshli qizni urib yuborgan. 

Soʻng qiz hududdagi markaziy shifoxonaga olib borilgan va birinchi tibbiy yordam koʻrsatilgan. Ahvoli yaxshiligi sababli shifoxonadan ruxsat berilgan. Hozirda holat yuzasidan Yuqori Chirchiq tumani IIB Yoʻl harakati xavfsizligi boʻlimi tomonidan surishtiruv ishlari olib borilayotgani qoʻshimcha qilingan. 

Biroq masʼullar tomonidan berilgan munosabat ijtimoiy tarmoq faollarini qoniqtirmadi. Masalan, Ekologiya vaziri maslahatchisi Rasul Kusherboyev "Qachongacha Oʻzbekiston bolalari yoʻllarda oʻlishda davom etadi?!" degan kinoyali savol bilan oʻzining Telegram'dagi shaxsiy kanalida post qoldirgan. Shuningdek, u qizchani urib yuborgan haydovchini "qotil" deb ham atagan.

"Qachongacha Oʻzbekiston bolalari yoʻllarda oʻlishda davom etadi? Maʼlum qilishlaricha, ushbu holat Yuqori Chirchiq tumanida yuqori tezlikda harakatlanib kelayotgan haydovchi (qotil) maktabga ketayotgan oʻquvchi bolani urib yuborgan. 

Bizga xavfsiz yoʻllar kerak. Bolalar qoʻrqmasdan yoʻllardan oʻtib maktabga borib kelishi kerak. IIO xodimlarini tasvirga olib, internetga joylaganlik uchun jazo berish tashvishi bilan yashayotganlarga savol: oʻzi qachongacha Oʻzbekiston bolalari yoʻllarda oʻlishda davom etadi?”, deya yozgan vazir maslahatchisi.

Xoʻsh, siz yuqoridagi vaziyatga qanday munosabat bildirasiz? Joylarda kuzatilayotgan bu hodisa uquvsiz haydovchilar aybdormi yoki ularning shunday boʻlishida yetarlicha tushuntirish bermayotgan masʼullarmi?