Ayrim oilalarga tabiiy gaz toʻlovlari uchun moddiy yordam beriladi

Bu tartib Prezidentning 2025 yil 2 apreldagi PQ–134-son qarori bilan tasdiqlangan.

Qarorga koʻra, moddiy yordam quyidagi toifadagi fuqarolarga beriladi:

1. Reyestrlarga kiritilgan oilalar:
— “Ijtimoiy himoya yagona reyestri” orqali bolalar nafaqasi va moddiy yordam oluvchilar;
— Kambagal oilalar reyestridagi fuqarolar.

2. Reyestrda boʻlmagan, ammo kam taʼminlangan deb topilgan oilalar:
— Oila aʼzosi boshiga toʻgʻri keladigan daromadi minimal isteʼmol xarajatlarining 1,5 baravaridan oshmaydigan oilalar.

Yordam tartibi
Tabiiy gaz boʻyicha kompensatsiya quyidagi koʻrinishda amalga oshiriladi:
— Isitish mavsumida: oylik 250 m³ meʼyordan ortiq isteʼmol qilingan qism uchun tariflar farqini davlat qoplaydi.
— Boshqa davrlarda: 150 m³ meʼyordan ortiq isteʼmol uchun tariflar farqi kompensatsiya qilinadi.

2025 yil 1 maydan 2027 yil 1 aprelgacha amal qiladi.

2025/2026 yilgi isitish mavsumi davomida reyestrlarga kiritilgan oilalar hamda “Mahalla yettiligi” tomonidan muhtoj deb topilgan, ammo reyestrda boʻlmagan oilalarga 1 mln soʻm miqdorida bir martalik moddiy yordam ajratiladi.