BAA kompaniyasi O‘zbekistonda 100 ta diagnostika markazi tashkil etadi

O‘zbekistonning BAAdagi elchisi Umid Shodiyev ushbu davlatdagi nufuzli “Unison Capital Investment” kompaniyasi ijrochi direktori Tamer Akl bilan uchrashdi.

Muzokaralar davomida davlat-xususiy sheriklik (DXSH) asosida sog‘liqni saqlash sohasida zamonaviy infratuzilmani rivojlantirish istiqbollari muhokama qilindi.

Muloqot chog‘ida Farg‘ona viloyatida DXSH asosida kompyuter tomografiyasi bo‘limlarini tashkil etish investitsiya loyihasini amalga oshirish masalalari ko‘rib chiqildi.

Shuningdek, kompaniya respublika bo‘ylab 100 ta to‘liq siklli diagnostika markazlarini tashkil etish rejalarini taqdim etdi.

Ushbu markazlarda quyidagi xizmatlarini joriy etish ko‘zda tutilmoqda:

• MSKT;
• MRT;
• Rentgenografiya;
• Gemodializ;
• laboratoriya diagnostikasi.

“Unison Capital Investment” – sog‘liqni saqlash va kapital talab qiladigan yo‘nalishlarda investitsiya loyihalarini amalga oshirishga ixtisoslashgan xususiy investitsiya kompaniyasi hisoblanadi.

Kompaniya tibbiy infratuzilmani rivojlantirish, investitsiyalarni boshqarish hamda davlat-xususiy sheriklik asosida loyihalarni amalga oshirish sohasida faoliyat yuritadi.

Bundan tashqari, kompaniya mintaqa bo‘yicha birinchi bo‘lib BAA Sog‘liqni saqlash vazirligi bilan hamkorlikda DXSH modeli asosida tibbiy infratuzilma loyihalarini amalga oshirayotgan xususiy tashkilotlardan biridir.