Bosh prokuratura OAV vakillarini ogohlantirdi

Maʼlum qilinishicha, soʻnggi vaqtlarda prokuratura tomonidan tergov qilinayotgan jinoyat ishi yuzasidan ijtimoiy tarmoqlar orqali tasdiqlanmagan va asossiz, shuningdek, ishonchli rasmiy manbalarga tayanilmagan xabarlar keng tarqalgan.

"Misol tariqasida Komil Allamjonovga uyushtirilgan suiqasd yuzasidan tegishli idoralarning malakali xodimlaridan iborat tezkor-tergov guruhi tuzilib, tergov harakatlari davom etmoqda. Biroq tafsilotlar haqida qoʻshimcha ravishda maʼlumot berilmadi. Ammo tarmoqlarda dezinformatsiyalar tarqalgan", deyiladi xabarida.

Shuningdek, Bosh prokuratura haqiqat boʻlmagan xabarlarni tarqatayotgan ijtimoiy tarmoq faollariga mazkur holat yuzasidan qonunchilikda javobgarlik belgilanganini eslatgan.

"Qonunchilikda axborot sohasidagi huquq hamda masʼuliyat aniq belgilangan. Buni, ayniqsa, faol va katta auditoriyaga ega blogerlar, ijtimoiy tarmoqlardagi guruh va kanallar maʼmurlari yaxshi his etishlari lozim. Chunki jamiyatda ular tarqatayotgan har qanday axborotni haqiqat sifatida qabul qiladiganlar koʻp", deyiladi manbada.

Shuningdek, prokuratura media vakillari ham xuddi davlat organlaridan talab etilgani kabi sohaga oid amaldagi qonunchilik meʼyorlariga rioya etishlari shart ekanligini unutmasligini bildirgan.

"Jamoatchilik orasida turli notoʻgʻri talqin va taxminlar tarqalishining oldini olish maqsadida, ommaviy axborot vositalaridan prokuratura organlari xodimlari oʻtkazgan tezkor yoki tergov tadbirlarini yoritishda faqat Bosh prokuratura matbuot xizmati tomonidan taqdim etilgan rasmiy maʼlumotlarga tayanishini va havola keltirishni qatʼiy soʻrab qolamiz", deyiladi prokuratura xabarda.

Bundan tashqari, yuqoridagi holat takrorlansa, yaʼni aholi orasida yolgʻon, haqiqatga toʻgʻri kelmaydigan va vahima chiqarishga qaratilgan materiallarni har qanday shaklda tarqatish uchun jinoiy javobgarlik mavjudligi taʼkidlagan.