Bukmekerlikni reklama qilish qonunchilikka zid – Raqobat qo‘mitasi ogohlantirdi

Sport natijalari bo‘yicha pul tikish, qisqa muddatda daromad topish yoki yirik yutuqlarga erishish haqidagi va’dalar orqali aholini tavakkalchilikka asoslangan o‘yinlarda ishtirok etishga undovchi reklama va axborot materiallari keng tarqatilmoqda.

O‘zbekiston Respublikasi “Reklama to‘g‘risida”gi Qonunining 46-moddasiga muvofiq, qimor o‘yinlari va tavakkalchilikka asoslangan boshqa o‘yinlar, shu jumladan telekommunikatsiya tarmoqlari hamda Internet jahon axborot tarmog‘idan foydalangan holda tashkil etiladigan qimor o‘yinlari va tavakkalchilikka asoslangan boshqa o‘yinlarni reklama qilish taqiqlanadi.

Shuningdek, bukmekerlik xizmatlari va qimor o‘yinlarini targ‘ib qilish, ularning reklamasini tayyorlash, joylashtirish, tarqatish yoki ommalashtirish bilan bog‘liq harakatlar amaldagi qonunchilik hujjatlarida belgilangan tartibda javobgarlikka sabab bo‘lishi mumkin.

O‘rganishlar shuni ko‘rsatmoqdaki, bukmekerlik xizmatlarini targ‘ib qiluvchi ayrim shaxslar o‘z faoliyatini anonim tarzda yuritish, soxta akkauntlar va taxalluslardan foydalanish hamda xorijiy elektron platformalar orqali reklama tarqatishga urinmoqda. Biroq bu kabi holatlar qonunchilik talablaridan chetda qolmaydi va vakolatli organlar tomonidan o‘rganib boriladi.

Raqobat qo‘mitasi fuqarolarni bukmekerlik xizmatlari va qimor o‘yinlarini targ‘ib qiluvchi shubhali reklama materiallariga ishonmaslikka, ularni tarqatmaslikka hamda bunday holatlarga duch kelgan taqdirda vakolatli organlarga ma’lum qilishga chaqirdi.