Alkogolli ichimliklarni reklama qilgan blogerga chora ko‘rildi

O‘zbekiston Respublikasining “Reklama to‘g‘risida”gi Qonunining 38-moddasiga muvofiq, har qanday quvvatdagi alkogolli ichimliklarning reklamasi taqiqlangan.

Faqat pivo, tabiiy va ko‘piklanadigan vinolarni qonunchilikda belgilangan vaqt, shakl va auditoriyaga oid cheklovlarga rioya qilingan holda reklama qilishga yo‘l qo‘yiladi.

Shu bilan birga, ijtimoiy tarmoqlarda alkogolli ichimliklar reklamasini har qanday shaklda tarqatish taqiqlangan.

Raqobat qo‘mitasi tomonidan o‘rganishlar davomida bloger N.Sobirovning ijtimoiy tarmoqdagi @nurbek_sobiroff sahifasida alkogolli ichimliklar reklamasi joylashtirilganligi aniqlandi.

Yuqoridagilardan kelib chiqib, Qo‘mita tomonidan reklama qilinishi qonunchilik bilan taqiqlangan mahsulotni reklama qilganligi uchun bloger N.Sobirov belgilangan tartibda ma’muriy javobgarlikka tortilib, tegishli hujjatlar sudga yuborildi.