Buxoroda 508 million so‘mlik qalbaki dori vositalari aniqlandi

Viloyat bojxona boshqarmasi Kontrabandaga qarshi kurashish bo‘limi tomonidan tezkor tadbir o‘tkazildi.

Unda nazorat ostiga olingan fuqaro Buxoro shahridagi xususiy dorixonalardan biri yaqinida hech qanday tegishli hujjatlarga ega bo‘lmagan ikki quti “Buserelin-Depo” nomli kontrafakt dori vositasini 2 million 900 ming so‘m evaziga sotayotgan vaqtida qo‘lga olindi.

Shundan so‘ng mazkur fuqaro faoliyati bilan bog‘liq bo‘lgan dorixona ko‘zdan kechirildi. Natijada savdo shoxobchasida tegishli hujjatlarsiz saqlanayotgan va sotuvga tayyorlangan umumiy qiymati 508 million so‘mlik 121 turdagi 13 ming 641 dona kontrafakt dori vositalari mavjudligi aniqlandi.

Bunday dori vositalarining nazoratsiz tarzda aholiga sotilishi inson salomatligi uchun jiddiy xavf tug‘diradi.

Ma’lum qilinishicha, joriy yil boshidan buyon Buxoro viloyati bojxona boshqarmasi tomonidan 26 ta holatda qiymati 8 milliard 860 million so‘mlik kontrafakt dori vositalari va tibbiyot buyumlarining noqonuniy aylanmasiga chek qo‘yilgan.